DILI, 07 fevereiru 2022 (TATOLI)—Timor-Leste hetan apresiasaun boot hosi nasaun viziñu Austrália, relasiona prevensaun no mitigasaun COVID-19.
“Timor-Leste iha previléjiu, ha’u atu ba vizita Austrália no simu prémiu ida kona-ba COVID-19 nian. Ema rekoñese ba ita-nia kapasidade tau-matan hodi salva sidadaun sira hosi pandemia ne’e,” Primeiru-Ministru (PM), Taur Matan Ruak, informa iha ámbitu enkontru ho diretór jerál no kargu ekiparadu, autoridade administradór munisipál no postu administrativu sira, iha auditorium Ministériu Finansa (MF), Aitarak-laran, segunda ne’e.
Notísia relevante: PM Taur sei vizita Austrália semana oin
Xefe Governu dehan, maski durante ne’e iha ámbitu luta kombate COVID-19, Governu hetan krítiku hosi parte balun, maibé kontinua esforsu ho kbiit no ajudu hosi parseiru dezenvolvimentu sira hodi hamenus risku moras ne’e, nune’e labele iha taxa óbitu a’as.
Alende ne’e, durante vizita Xefe Ezekutivu sei hasoru malu ho Primeiru-Ministru Austrália, Scott Morrison, hodi diskute kona-ba asuntu kampu Greater Sunrise no petróleu.
Desde loron 20 marsu 2020 to’o agora, kazu rejistadu COVID-19 iha Timor-Leste hamutuk 20.403, totál rekuperadu 19.749, kumulativu óbitu 112 no totál ativu 532.
Taxa partisipasaun nível nasionál ba vasina doze dahuluk 71,8%, doze daruak 60,4% no doze Booster 0,9%
Jornalista : Antónia Gusmão
Editora : Julia Chatarina
