DILI, 08 marsu 2022 (TATOLI)–Prezidente Komisaun nasionál Eleisaun (CNE-sigla portugés), José Agostinho da Costa Belo, hateten CNE deside Televizaun Grupu Mídia Nasionál (GMN TV) mak sei ha’o transmisaun ba debate públiku kandidatu Preziente Repúblika períodu 2022-2027.
Notísia Relevante: Debate públiku, ekipa susesu Kandidatu Lú Olo propoin utiliza kanál RTTL, E.P
“Iha plenária CNE nian, ita deside sei uza kanál GMN TV ba kandidatu Prezidente Repúblika 2022-2027 nian atu halo debate pubiku tanba sira aprezenta kustu ne’ebé mak kiik liu,” José Belo hateten ba Agência TATOLI, hafoin partisipa enkontru ekstraordináriu ba realizasaun eleisaun prezidensiál 2022 iha Austrália, iha salaun Laline Larigutu CNE, Dili, tersa ne’e.
Iha momentu ne’ebá ne’e, mídia tolu hanesan GMN TV, Radio Televizaun Timor-Leste (RTTL) no Televizaun Edukasaun (TVE) mak mai hatama proposta ba CNE maibé TVE tarde entaun la konsege hatama no RTTL nia kustu boot liu.
Antes ne’e, iha loron 07 marsu 2022, ekipa susesu kandidatu Prezidente Repúbliku (PR), Francisco Guterres ‘ Lú Olo’, propoin ba CNE atu utiliza kanál Rádiu Televizaun Timor-Leste, Empreza Públika (RTTL, E.P) ba debate públiku Kandidatu PR sira, ne’ebé tuir planu sei realiza iha loron 15 marsu 2022.
“Ami hato’o ona karta protesta ida ba CNE, ligasaun ba planu atu halo debate entre kandidatu sira, ne’ebé deside atu fó responsabilidade ne’e iha koordenasaun GMN TV nian. Tuir ami-nia haree katak debate ne’e loloos halo iha ita-nia RTTL, E.P ho razaun tanba kanál kobertura to’o ba Timór laran tomak no bele kobertura luan liután kompara ho GMN TV ne’ebé ninia kobertura ne’e la boot hanesan RTTL, E.P nian.
Jornalista : Osória Marques
Editór : Cancio Ximenes
