VIQUEQUE, 16 marsu 2022 (TATOLI)-–Diretór Servisu Sekretariadu Tékniku Administrasaun Eleitorál (STAE) munisípiu Viqueque, Humberto da Costa, infoma, prosesu loke pakote sensitivu ba Eleisaun Prezidensiál períodu 2022-2027 verifika ona no identifika buletin votu 11 kona tinta.
“Buletin iha 11 ne’ebé imprimi iha nasionál tinta kona sai hanesan bintik-bintik,” Diretór STAE hateten ba Agência TATOLI, iha ninia knaar fatin, kuarta ne’e.
Nune’e, STAE koordena ona ho fiskál sira hosi reprezentante Kandidatu Prezidente Repúblika na’in-16 iha munisípiu Viqueque.
“Ita tau atensaun ba seriál buletin votu ne’ebé tinta kona atu distribui ba sentru votasaun ka estasaun votasaun ne’e, ita labele fó ba eleitór sira, ita konsidera buletin ne’e la uza. Tanba ne’e, imprimi hosi nasionál,” nia akresenta.
Notísia relevante: STAE Viqueque simu materiál sensitivu kaixa 23 ba Eleisaun Prezidensiál
Nune’e mós, nia dehan loke pakote sasán sensitivu munisípiu Viqueque hahú segunda no ramata iha tersa ne’e, ne’ebé ohin prepara ba materiál naun sensitivu.
Tuir dadus, materiál sensitivu no naun sensitivu ne’ebé distribui mai munisípiu Viqueque hamutuk kaixa 23, kompostu hosi livru buletin votu hamutuk 1.321 no folla hamutuk 66.500, maibé iha buletin votu 11 mak konsidera a’at.
Eleitór ba tinan ne’e iha munisípiu Viqueque hamutuk 58.421, kompostu hosi mane 2.9675 reprezenta 51% no feto 2.8746 reprezenta 49%.
Munisípiu Viqueque estabelese sentru votasaun hamutuk 92 no estasaun votu 110 iha postu lima.
Jornalista : Vitorino Lopes da Costa
Editora : Julia Chatarina
