DILI, 16 marsu 2022 (TATOLI)—Administradór Postu Administrativu Cristo Rei, Munisípiu Dili, Venancio Tavares, hateten durante nia mandatu ne’e nia sei fó prioridade ba bee-moos tanba populasaun iha Cristo Rei presiza bee-moos.
“Ha’u-nia programa prioridade iha Cristo Rei, liu-liu mak bee-moos, tanba durante tinan besik 20 nia laran komunidade sempre kestiona ba bee-moos, tanba ne’e durante ha’u-nia mandatu ha’u fó prioridade ba bee-moos atu rezolve problema ne’ebé ita-nia komunidade Cristo Rei sira enfrenta,” Venancio Tavares hateten ba Agência Tatoli, iha nia knaar fatin, Becora, Díli, kuarta ne’e.
Aleinde bee moos, administradór postu Administrativu Cristo Rei ne’e sei fó mós prioridade ba edukasaun no ambiente atu enkoraja populasaun sira bele kuda ai-oan.
“Hosi atividade sira-ne’e, ha’u sei haree mós ba infraestrutura, tanba iha ne’e iha seksaun kona-ba infraestrutura atu nune’e bele haree ba ponte oan ruma aat ka estrada balun la di’ak, ita informa ba parte relevante atu hadi’a,” nia afirma.
Nia akresenta, tuir lolos komunidade hotu iha Cristo Rei asesu ba bee-moos maibé tanba menus kontrolu hosi BTL, E.P entaun komunidade balun mak hetan no balun la hetan.
“Tanba, ema ne’ebé bee iha, nia husik bee suli arbiru no laiha regra ruma ne’ebé atu aplika ba sira, entaun hosi ne’e ha’u rekomenda ba BTL, E.P tenke hamosu regra, atu sé mak husik bee sai arbiru tenke kona sansaun. Alende ne’e ba sira-ne’ebé uza sanyo mós tenke hetan sansaun,” nia hateten.
Nia husu ba komunidade sira labele fura kanu no husu ba BTL, E.P tenke halo regra ne’ebé di’ak no regra ne’e labele halo de’it, maibé tenke aplika atu nune’e ita-nia komunidade sira tauk atu husik bee sai estraga no fura kanu arbiru.
Jornalista : Nelia Fernandes
Editór : Cancio Ximenes
