DILI, 19 marsu 2022 (TATOLI)-Ekipa susesu kandidatu ho númeru sorteiu 10, Antero Bendito da Silva, konsidera Sekretariadu Tékniku Administrasaun Eleitorál (STAE) falla organiza votasaun paralelu, tanba ema kuaze 2000 mak lakon direitu votu.
“Ami lamenta tebes, tanba ami-nia militante, maioria universitáriu besik 2.000 iha Dili mai husi munisípiu Baukau, Lospalos, Vikeke, Suai ho Manufahi, inklui militante besik 30 iha Ospitál referál Baukau labele ezerse sira-nia direitu voto nu’udar sidadaun”, Fernando Ximenes, reprezenta ekipa susesu hatete liuhosi komunikadu ne’ebé TATOLI asesu, ohin.
Portavós iha ninia komunikadu konsidera STAE falta halo koordenasaun, la halo servisu ne’ebé efetivu no hamosu irregularidade.
Fernando hatete, naran ne’ebé rejistu ona la mosu hanesan lista votante. Hirak ne’e akontese iha sentru paralelu eskola vokasionál Bekora (STM), Gináziu Dili no INAP.
“Ami-nia votante sira iha ospitál Baukau ne’ebé labele ezerse sira nia direitu, tanba la konsege rejistu”, afirma.
Fernando hatutan tan: “Ami konklui katak ne’e la’ós de’it problema STAE-CNE nia falta koordenasaun ka inefitividade, maibé iha tentativa sistemátiku hodi impede ema kiak sira hodi fó votus ba kandidatu independente, liuliu ami nia kandidatura númeru 10”.
Notísia relevante: Eleitór la vota iha sentru votasaun paralelu tanba la rejista iha STAE
Journalista : Camilio de Sousa
Editora : Rita Almeida
