DILI, 29 marsu 2022 (TATOLI)—Primeiru-Ministru (PM) no Ministru Interiór (MI), Taur Matan Ruak, tersa ne’e, konvoka reuniaun ho entidade relevante hodi halo koordenasaun di’ak ba seguransa Eleisaun Prezidensiál segunda volta.
Entidade hirak ne’e mak hanesan Vise-Ministru Interiór interinu, Joaquim Gusmão dos Reis Martins no Komandante Jerál Polísia Nasionál Timor-Leste (PNTL), Faustino da Costa no segundu komandante jerál, Mateus Fernandes.
“Ha’u reprezenta Vise-Ministru Interiór hamutuk ho Komandante Jerál no Adjuntu mai atualiza situasaun jerál ba Primeiru-Ministru no mós simu orientasaun ba eleisaun segunda volta,” atuál Sekretáriu Estadu Protesaun Sivil ne’e relata hafoin ramata reuniaun ho Xefe Governu, iha Palásiu Governu.
Notísia relevante: PNTL preparadu asegura kampaña no eleisaun prezidensiál segunda volta
Hosi parte PNTL relata reuniaun avaliasaun ba Eleisaun Prezidensiál primeira volta no preparasaun ba segunda volta ne’ebé sei realiza iha loeon 19 abríl ne’e.
“Ami rekoñese iha difikuldade no limitasaun barak mak hasoru durante Eleisaun Prezidensiál ne’e no identifika menus rekursu, ekipamentu, no viatura, maibé ida-ne’e la sai obstákulu ba ami hala’o funsaun, realidade PNTL hala’o servisu iha terrenu ho di’ak. Tanba ne’e liuhosi reuniaun jerál ne’ebé Komandu halo ona hodi haree filafali situasaun iha primeira volta nian halo nusa maka bele haree pontu frakeza no pontu forte iha segunda volta mai bele atende di’ak liután,” nia dehan.
Preparasaun ne’ebé daudaun halo hodi asegura seguransa iha segunda volta laiha mudansa signifikante, planu operasaun komandu iha ona no hein de’it implementa inklui orientasaun hosi Primeiru-Ministru atubele haree ba situasaun ne’ebé akontese iha terrenu hanesan perturbasaun balun ne’ebé akontese.
“Primeiru-Ministru mós orienta atu halo aprosimasaun ba ekipa susesu sira atubele garante katak apoiante sira labele kria tan perturbasaun hanesan akontese iha primeira volta,” nia tenik.
Antes ne’e, PNTL desloka membru hamutuk 4.000 resin atu asegura kampaña no Eleisaun Prezidensiál iha territóriu nasionál.
Jornalista : Antónia Gusmão
Editora : Julia Chatarina
