DILI, 30 marsu 2022 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Falur Rate Laek, informa prosesu konstrusaun ba portu navál Hera daudaun ne’e hahú konstrui ona ho ateru rai.
Notísia Relevante: TL-Austrália asina akordu ba konstrusaun portu Hera
“Parte Austrália sira hadi’a zona B ne’ebé komesa konstrui hodi ateru rai ba leten,” Tenente Jenerál Falur Rate Laek relata ba jornalista sira hafoin halo enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, kuarta ne’e.
Antes ne’e, iha loron 13 agostu 2021 Governu Timor-Leste (TL) liuhosi Ministru Defeza (MD), Filomeno da Paixão de Jesus ho Embaixadór Austrália iha TL, Petter Roberts, asina ona akordu ba konstrusaun portu Navál Hera.
Liuhosi akordu ne’e, Governu Austrália hakarak ajuda TL halo konstrusaun ba portu ne’e to’o finaliza, ne’ebé sei fasilita ekipa tékniku no materiál atu mai TL hodi bele hahú konstrusaun, hodi prepara ba ró rua ne’ebé Austrália rasik sei oferese ne’ebé tuir planu sei to’o iha TL iha 2023.
Austrália fó apoiu tanba nasaun rua ne’e depedente-malu iha área fronteira sira no presiza serbisu hamutuk atu asegura tasi.
Tanba ne’e, iha 2017 Austrália ho TL konkorda sei fornese ró patrullamentu rua ba TL no sei haruka mai TL iha 2023, nune’e pakote ida ho infraestrutura.
Kona-bá orsamentu hira mak Austrália aloka ba apoiu konstrusaun ne’e la fó-sai iha akordu ne’e, maibé kompromete sei finaliza kontrusaun iha tempu badak.
Tenente Jenerál hateten, kona-ba rekursu umanu preparadu tanba militár na’in 30-resin hetan kapasitasaun durante ne’e iha área espesializasaun ida-idak no hala’o akompañamentu ba iha Austrália nune’e bele operasionaliza ró refere bainhira mai ona Timor-Leste.
Tuir kálkulu, konstrusaun portu navál Hera presiza orsamentu millaun $20-resin maibé Governu rua sei aloka orsamentu pur faze to’o konstrusaun ramata.
VII Governu konstituisionál iha polítika no planu ba konstrusaun portu no sosa ró atu bele halo operasaun iha tasi mane, ne’ebé foku ba patrullamentu no lojístika bainhira halo produsaun mina iha tasi Timór, liu-liu tau-matan ba polusaun, inséndiu no ema ilegál ne’ebé tama no sai tasi laran.
Jornalista : Nelson de Sousa
Editór : Cancio Ximenes
