DILI, 28 abríl 2022 (TATOLI)—Governu liuhosi Ministériu Administrasaun Estatál (MAE) hamutuk ho Komisaun Funsaun Públika (CFP-sigla portugés) realiza sorumutu ba preparasaun loron nasionál funsaun públika-nian ne’ebé sei selebra iha 15 jullu 2022.
Vise-Ministru Administrasaun Estatál (MAE), Lino de Jesus Torrezão, informa tema ba selebrasaun mak “Hakbi’it Servidores Estadu hodi Asegura Kualidade Servisu ba Públiku, iha Desentralizasaun Administrativa no Futuru Poder Lokál iha Timor-Leste”.
“Ohin ne’e, aprezenta programa no kalendáriu ba liña ministeriál sira inklui ba autoridade munisipál, nune’e hetan input, apresiasaun no kolaborasaun mutua hodi realiza atividade la’o di’ak no susesu iha nível nasionál”, Lino de Jesus Torrezão hateten iha salaun MSSI Kaikoli, kinta ne’e.
Tuir planu, Vise MAE, Lino de Jesus Torrezão, mak sei halo abertura bazea ba rifa ne’ebé dada iha salaun VIP Komisaun Nasionál ba Eleisaun (CNE, sigla portugés), katak MAE mak sai uma-nain ba selebrasaun loron nasionál funsaun públika.
Prezidente CFP, Faustino Cardoso, hateten liuhosi rezolusaun Governu ne’e valoriza di’ak liután funsionáriu públiku nia servisu.
“Rezolusaun Governu 22, iha loron 15 jullu nu’udar dia institusionál ba funsaun públika nune’e fó valorizasaun ba funsionáriu públiku”, Prezidente CFP ne’e hateten.
Notísia relevante: Governu aprova projetu lei KFP define polítika ba funsionamentu públika
Jornalista : Osória Marques
Editór : Cancio Ximenes
