DILI, 05 jullu 2022 (TATOLI)— Uniaun Europeia (UE), tersa ne’e, apoia ekipamentu hanesan komputadór no Software analítiku ba Polisia Siéntifika Investigasaun Kriminál (PCIC, sigla portugés), hodi kombate kriminalidade ekonómiku, finanseiru no krime sibernétika.
Objetivu entrega servidór seguru sira ba PCIC atu eleva ekipamentu ho kapasidade tékniku, mak sei kontribui ba aumentu kualitativu iha dezenvolvimentu ba programa sira hosi siber-seguransa no kombate ba siberkrime no liuliu diresionadu ba sira nia nesesidade operasionál sira.
“Ekipamentu ne’e fasilita servisu PCIC nian, liga ba kombate kriminalidade ekonómiku, finaseira no krime sibernétika ka krime informátika,” Diretór PCIC, Vicente Fernades e Brito, hateten ba jornalista, iha salaun Ministériu Justisa-Caicoli, tersa ne’e.
Alende ne’e, hala’o asinatura hosi Adenda ba Akordu Delegasaun entre Uniaun Europeia no Koperasaun Portugés, no Entrega Servidór Seguru ba PCIC, iha ámbitu husi projetu PFMO-Komponente 2 “OSAN POVU NIAN, JERE HO DI’AK”.
PFMO iha objetivu atu reforsa kapasidade ba kontrolu husi finansas públikas husi instituisaun estatál no la estatál, liu-liu husi Parlamentu Nasionál, Gabinete Inspesaun-Jerál, Kámara Konta, Komisaun Anti-korrupsaun, Polīsia Siéntifiku no Investigasaun Kriminál, Komunikasaun Sosiál no Organizasaun sira husi Sosiedade Sivil.
Asinatura ba adenda hodi prolonga ezekusaun ba projetu ba períodu adisionál hosi fulan-18 tan, to’o loron 31 agostu tinan 2023.
Estensaun ida ne’e rezulta husi nesesidade atu remata asaun sira mak previstu iha períodu inisiál husi implementasaun (entre fulan-Setembru tinan 2017 to’o fulan-fevereiru tinan 2022), nomós atu ezekuta atividade sira foun husi Gouvernu Timor-Leste nia solisitasaun.
Iha fatin hanesan, Ministru Justisa, Tiago Amaral Sarmento, hateten kooperasaun ida ne’e hanesan kooperasaun institusionál liuhosi Uniaun Europeia no PCIC bele apoia malu iha área formasaun ba funsionáriu sira no kombate kriminalidade ekonómiku, finaseira no krime sibernétika
“Ita asina akordu ne’e ho orgullu bo’ot ida ba ita no agradese ba apoia ekipamentu ba PCICI atu suporta servisu PCIC hodi servisu liga ba prevensaun kombate krime, sibernétika no krime finansiamentu ne’ebé akontese iha ita nia rai,” nia afirma.
Entretantu, Embaixadór UE, Andrew Jacobs, hateten asina akordu estensaun ho Institusaun Camões hodi estende programa PFMO nian liuhosi projetu “OSAN POVU NIAN JERE HO DI’AK” ba to’o 2023 hodi fó apoia asisténsia ba formasaun no kapasitasaun ba funsionáriu PCIC nian iha área jestaun finansa públiku.
“Kooperasaun seluk ami ho PCIC mak ami fó apoia komputadór Software hodi fasilita serbisu PCIC nian liga ba kombate kriminalidade ekonómiku, finaseira no krime sibernétika,” tenik nia.
Serimónia hetan prezensa hosi Ministru Justisa, Tiago Amaral Sarmento, Embaixadór Uniaun Europeia, Andrew Jacobs, Embaixadóra Portugál, Manuela Bairos, Diretór Programa hosi Servisu Ordenador Nasionál, Gregório Ferreira da Silva, no mós hosi Diretór Nasionál hosi PSIK, Vicente Fernandes e Brito, no dirijente seluk tan.
Jornalista: Natalino Costa
Editór : Florencio Miranda Ximenes
