VIQUEQUE, 06 jullu 2022 (TATOLI)–Xefe sentru saúde postu Viqueque vila, Celestina da Costa Alves, informa, durante ne’e sentru saúde postu Viqueque vila la simu aimoruk ho marka dexamethasone no simvastatin.
“Aimoruk ho marka dexamethasone no simvastatin durante ne’e iha sentru saúde laiha, bainhira ministériu fó sai ona despaixu sira trava ona,” Xefe sentru saúde postu Viqueque vila, hateten ba Agência Tatoli, via telefónika, kuarta ne’e.
Notísia relevante: SAMES distribui aimoruk dexamethasone-simvastatin tablet 245.000 ba fasilidade saúde-sira
Tuir Celestina, aimoruk tipu rua ne’e, kuaze tinan hirak ne’e stock la tama iha sentru saúde internamentu iha Viqueque vila.
“Ha’u hanoin ai-moruk tipu rua ne’e iha nasionál maka iha munisípiu ami la simu,” nia akresenta.
Nia dehan, molok COVID-19, aimoruk dexamethasone uza iha sentru saúde postu Viqueque vila, maibé iha tinan 2022 la simu ona.
“Ha’u haree aimoruk dexamethasone uza iha Dili de’it, tanba iha ninia kategoria aimoruk ne’e labele uza iha internamentu sira hanesan iha Viqueque,” nia tenik.
Jornalista : Vitorino Lopes da Costa
Editora : Julia Chatarina
