DILI, 12 jullu 2022 (TATOLI)–Diretór Servisu Edukasaun Rejiaun Administrativu Espesiál Oé-cusse Ambeno, Daniel Mauno, hateten, responsável sira presesa hela pagamentu retroativu ba profesór 198.
“Iha jullu ne’e buat hotu-hotu inklui administrativamente prosesa ona no parese Prezidente Autoridade mós asina ona,” Diretór informa iha Otél Novo Turismo, Bidau Lesidere, tersa ne’e.
Tuir Diretór, kuandu prosesu kona-ba direitu retroativu ba profesór 198 ne’e maka ramata ona, autoridade sei haruka ba Banku hodi bele aselera prosesu pagamentu.
Notísia relevante: Dadus provizóriu: estudante 17.283 hosi Dili sei partisipa ezame nasionál
Kona-ba dadus antes ne’ebé parte Diresaun Servisu Edukasaun RAOEA asesu, iha de’it profesór 116 maka hetan direitu ba retroativu, maibé tanba desizaun koletiva, maka númeru profesór sa’e.
“Ita hakarak profesór hotu tenke iha direitu hanesan ba retroativu ne’e maka ita hasa’e númeru profesór atu hetan direitu ne’e ba 189. Hosi dadus ida-ne’e maka daudaun iha ona prosesu nia laran, fiar katak bainhira laiha impedimentu ruma, fulan ne’e bele hetan ona rezultadu,” nia akresenta.
Aleinde ne’e, iha ámbitu preparasaun Diresaun Servisu Edukasaun RAEOA hasoru prosesu ezame nasionál, verifika hotu ona dadus estudante finalista sira hosi ensinu báziku terseiru siklu, sekundáriu no tékniku vokasionál no sei submete ba edukasaun nasionál.
“Ita haruka hotu ona dadus estudante sira mai Ministériu, maibé dadus estudante sira ha’u la fiksa didi’ak,” nia tenik.
Jornalista : Tomé Amado
Editora : Julia Chatarina
