DILI, 21 jullu 2022 (TATOLI)—Jerente estasaun kombustível Aitula Fuel, Lda, Fátima Silva Ferreira, hateten, kada semana sempre halo mudansa ba folin kombustível tanba depende ba mina ne’ebé simu hosi distributór sira.
“Kombustível ne’ebé sosa hosi empreza ETO,Lda, gazolina $1,48 no gazoleu $1,66 nune’e fa’an fali hasa’e folin aumenta $0,20. Folin iha fulan-jullu iha Dili ba gazolina $1,50 no gazoleu $1,68, enkuantu ba munisípiu sira gazolina $1,55 no gazoleu $1,73,” Jerente informa ba Agência Tatoli, iha Comoro, kinta ne’e.
Notísia relevante: Folin mina sa’e, estasaun kombustivel Mãe de Graça nia rendimentu menus
Iha fulan-juñu, folin kombustível iha mudansa, ne’ebé sosa hosi distributór, gazolina $1,51 no gazoleu $1,70, nune’e estasaun kombustível fa’an fali hasa’e $0,20 iha Dili gazolina fa’an $1,50 no gazoleu $1,72, fa’an ba munisípiu sira gazolina $1,58 no gazoleu $1,78.
“Folin sira ne’e ita hasa’e depende ba situasaun, maibé ita hasa’e la barak, oituan de’it mak $0,20,” nia akresenta.
Nune’e mós, Diretór estasaun kombustível ETO Lda, Hali-Laran, Jaime Guterrres, hateten, estasaun kombustível ne’e kada semana no fulan sempre halo mudansa ba folin kombustível.
“Daudaun ne’e folin gazolina hahú hosi $1,45 no gazoel $1,48, ami fa’an fali $1,61, premium $1,59,” Jaime Guterrres tenik.
Nia dehan, folin kombustível sempre iha mudansa tanba depende ba mina ne’ebé tama.
“Kompara ho fulan kotuk no agora ne’e mudansa folin ne’e sa’e, maibé bainhira ita fa’an ne’e hasa’e $0,5 to’o $0,10,” nia salienta.
Jerente estasaun kombustível Lafaek, Zelia de Araújo, informa, sira fa’an kombustível ba fulan-jullu ba gazolina $1,57 no gazoleu $1,72.
“Fulan-juñu ita fa’an gazolina $1,47 no gazoleu $1,52, ne’ebé folin kada fulan iha mudansa tanba depende ba ita sosa mina hosi distributór globál,” nia akresenta.
Jornalista : Arminda Fonseca
Editora : Julia Chatarina
