DILI, 27 jullu 2022 (TATOLI)—Koordenadór Sentru Formasaun Téknika Komunikasaun (CEFTEC-sigla portugues), Rafael da Silva Freitas, informa daudaun ne’e CEFTEC submete ona relatóriu estabelese institutu formasaun jornalista ba Ministériu Asuntu Parlamentár no Komunikasaun Sosiál (MAPKOMS).
Nia infroma, tuir planu relatóriu ne’e Ministru Asuntu Parlamentár no Komunikasaun Sosiál (MAPKOMS), Francisco Jerónimo, sei aprezenta ba Konsellu Ministru hodi debate.
Notísia Relevante: CEFTEC sei submete relatóriu estabelese Institutu Formasaun Jornalista ba MAPKOMS
“Relatóriu estabelese institutu formasaun jornalista, segunda (25/07), ami submete ona ba Ministru (MAPKOMS) no agora daudaun iha Gabinete Ministru,” Rafael da Silva Freitas hateten ba Agência Tatoli iha nia knar fatin, Palásiu Governu, Díli, kuarta ne’e.
Nia esplika, iha relatóriu ne’e rezumu lubuk ida mak iha laran, komesa hosi CEFTEC nia preparasaun hanesan semináriu internasionál, foku diskusaun grupu no simpóziu nasionál.
Iha relatóriu laran ne’e mós iha akademista balun, ANAAA, Konsellu Imprensa sira-nia hanoin, ne’ebé mak sira fó liuhosi simpoziu nasionál, entaun relatóriu ne’ebé CEFTEC halo loron rua iha fulan-maiu liubá, sira-nia hanoin hotu tau iha relatóriu ne’e no submete ona ba Ministru, atu lori ba diskute ne’e kompetensia tomak iha Ministru nia liman.
Tanba, nia dehan, relatóriu ne’e hanesan estudu viabilidade ida atu instala institutu formasaun jornalista iha Timor-Leste.
“Ida ne’e ita lori ba, tanba desizaun iha ne’ebá. Maibé, ba parte téknika ita-nia servisu to’o iha ne’e, atu lori ba nível polítiku hanesan lori no debate iha reuniaun Konsellu Ministru ne’e, depende ba Ministru,” nia dehan.
Jornalista : Nelia Fernandes
Editór : Cancio Ximenes
