DILI, 29 jullu 2022 (TATOLI)— Ministru Asuntu Parlamentar no Komunikasaun Sosiál (MAPKOMS), Francisco Martins da Costa Pereira Jerónimo, enkoraja Agência Noticiosa de Timor-Leste-TATOLI, Institutu Públiku (Agência Tatoli, I.P) atu kontinua públika informasaun ho lais, maibé tenke loloos no kredivél.
Mnistru Francisco Jerónimo hato’o asuntu ne’e iha ámbitu abertura semináriu ho tema: “Reforsa Papél TATOLI, I. P Hodi Hasa’e Koñesimentu Públiku ba Domina Siénsia no Téknolojia liuhosi Informasaun,” ne’ebé realiza iha sekuénsia ba selebrasaun aniversáriu Agência Tatoli, I.P ba da-VI iha loron 27 jullu 2022.
“Ho aniversáriu TATOLI nian ba dala-neen. Ha’u husu ba TATOLI buat ida de’it tenke lalais iha nia públikasaun sira, maibé informasaun tenke loloos no kredivél,” Governante ne’e hateten iha diskursu abertura ba semináriu refere iha edifisiu TATOLI-Faról, sesta ohin.
Governante ne’e mós husu Agência TATOLI atu hala’o kna’ar tuir prinsípiu jornalistiku nia hodi sai matan no tilun ba povu nian no fó asisténsia ba públiku sira. Tanba Agência TATOLI ne’e hetan finansimentu hosi Orsamentu Jerál Estadu (OJE).
“Ha’u husu mós TATOLI atu halais públikasaun notísia liu ho media seluk no TATOLI labele buka ka foti fali notísia hosi média seluk nia hodi públika fali iha portál Tatoli, ne’e la loos ona,” Governante ne’e enkoraja.
Biban ne’e, MAPKOMS mós hato’o agradesementu eis Sekretáriu Estadu Komunikasaun Sosiál (SEKOMS), Nelio Isaac Sarmento, tanba ho esforsu-ninian hodi harii Agência TATOLI ne’ebé kontinua eziste to’o ohin loron nu’udar média estatál.
Iha fatin hanesan, Prezidente Konsellu Diretivu Agência TATOLI, I.P, Manuel Pinto, informa ba aniversáriu TATOLI. I, P ba dala-neen ho objetivu hakarak hetan hanoin sira hodi adapta ba iha evolusaun teknolójia.
“Ho semináriu sira hanesan ne’e, ita hakarak atu hadi’a no buka atu TATOLI bele la’o di’ak liután tanba mundu ida agora la depende ba ami de’it,maibé klaru katak tenke mai hosi ita bo’ot sira nia ajuda atu dezenvolve TATOLI iha futuru la’o di’ak liután hodi serbí Estadu LIUHOSI Informasaun,” Prezidente ne’e akresenta.
Tanba, TATOLI hanesan média estatál ka média Estadu ne’ebé fó sai informasaun ka notísia sira ba nasionál, rejionál no internasionál.
Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.
Entertantu, oradór ba iha semináriu ho tema “Reforsa Papél TATOLI IP hodi Hasa’e Koñesimentu Públiku ba Domina Siénsia no Teknolójia liuhosi Informasaun” hanesan Ministru Asuntu Parlamentár, Francisco Jerónimo, Prezidente Konsellu Diretivu TATOLI, I.P, Manuel Pinto, Padre Bento Barros, Eis Sekretáriu Estadu Komunikasaun Sosiál Nelio Isaac Sarmento, Diretora Nasionál Polítika Jéneru no Inkluzaun, Sekretária Estadu Igualdade Inkluzaun (SEII), Maria Filomena Babo Martins, Observadór Ricardo Antunes, Eis Prezidente Agência TATOLI I.P José da Costa, ne’ebé modera hosi eis Ministru Edukasaun João Cancio.
Jornalista: Natalino Costa
Editór : Florencio Miranda Ximenes
