DILI, 17 agostu 2022 (TATOLI)— Diretór Nasionál Saúde Públika iha Ministériu Saúde, Frederico Bosco, informa hahú hosi fulan janeiru to’o juñu tinan ne’e, Ministériu Saúde rejista pasiente afetadu Infesaun Vias Respiratóriu Aguda ka ISPA iha territóriu nasionál hamutuk 139,638.
“Durante ne’e, fasilidade saúde iha territóriu nasionál rejista pasiente Infesaun Vias Respiratóriu Aguda ka ISPA hamutuk 139,00, hosi númeru mane na’in-64.001 (46%) no feto 75.637 (54%),” Diretór Nasionál Saúde Publika Ministériu Saúde Frederico Bosco informa ba TATOLI iha nia kna’ar fatin Caicoli ohin.
Moras Infesaun Vias Respiratóriu Aguda ka ISPA nia sintomas mak inus metin, mear, kakorok moras no isin manas no vontade laih atu han.
“Atu prevene moras infensaun vias respiratóriu ida ne’e tenke uza máskara bainhira la’o sai ba fatin públiku liuliu ema ne’ebé mak sa’e motór,” nia sujere.
Nune’e mós ba kazu pneumonia iha fulan janeiru too juñu hamutuk 3.506, hosi númeru mane hamutuk 1.741 no feto 1.765. Kazu hirak ne’e maioria ba labarik no mós ema boot.
Frederico Bosco esplika moras pneumonia ne’e kontribui ka afeta ba ema hirak ne’ebe fuma sigarru, horon sigarru suar no mama malus.
Moras ISPA afeta ba pulmaun bolu dehan pneumonia no bronkoneumonia entaun ida ne’e halo ema baixa iha ospitál sira barak no médiku sira halo tratamentu antibiotiku kompletu durasaun loron hitu to’o loron 14, hafoin rekupera fila-fali.
Jornalista : Felicidade Ximenes
Editór : Florencio Miranda Ximenes
