DILI, 22 agostu 2022 (TATOLI)— Tribunál Distritál Dili (TDD), segunda (22/8) ne’e, liuhosi interrogatóriu dahuluk deside aplika Termu Identidade Rezidénsia (TIR) no Aprezentasaun Periodika ba arguidu na’in-sia, ne’ebé deskonfia komete kazu tentativa omísidu hasoru membru Persadaraan Setia Hati Terate (PSHT) iha Vila-Verde, Dili.
Kazu ne’e akontese iha loron sesta (19/08), tuku iha 4:00, madrugada bainhira membru PSHT na’in-ualu fila ba uma, hafoin ramata seremónia graduasaun iha Gináziu Dili,maibé hetan tuda hosi suspeitu sira hodi rezulta membru PSHT nain-rua hetan kanek grave no nain-tolu seluk hetan kanek kamaan.
Durante julgamentu interrogatóriu dahuluk ba arguidu ADJ, PCJ, SO, FC, JSV, JDB, NJ, JRS no PT, Ministériu Públiku (MP), promove arguidu sira ho krime ofensa integridade fizika simples ne’ebé previstu iha ártigu 145, hosi kódigu penál Timor-Leste no krime arma branka hosi lei arma branka númeru 5/2017.
Hafoin rona tiha arguidu nia deklasaun, Ministériu Públiku promove arguidu na’in-ida ho Termu Identidade RezidÉnsia no Aprezentasaun Periodika, nune’e arguidu iha obrigasaun aprezenta aan ba Eskuadra Polísia ne’ebé besik fulan rua dala-ida no arguidu nain -ualu seluk MP alega medida koasaun Termu Identidade Rezidénsia (TIR).
Hafoin rona tiha parte hotu, Tribunál hatun akordaun hodi aplika TIR no aprezentasaun Periodika ba arguidu ida ne’ebé sai autór prinsipál ba kazu ne’e, na’in-ida Tribunál deside arquiva de’it tanba konsidera minoridade hafoin MP aprezenta tiha nia sertidaun moris nia ba tribunál no arguidu nain-hitu seluk tribunál aplika medida koasaun TIR.
Nune’e, Defeza arguido na’in-sia hosi Defensór Públiku, Estaqui Guterres, hateten entre arguidu nain-sia ne’e iha ida maka konfesa ba tribunál katak, nia maka halo asaun hasoru membru PSHT sira ne’ebé maka momentu ne’e halo konvoiu hafoin simu graduasuan iha Gináziu Dili.
“Ho motivu nia la gosta sira nia konvoiu ne’e, tanba ne’e nia lori fiska tiru sira, tanba arguidu nia maun hanesan membru hosi PSHT ida, iha uma baku hela de’it nia entaun ho ida ne’e nia hirus hodi halo asaun ne’e hasoru nia maluk sira,” Defeza Estaqui Guterres hateten ba Agência TATOLI, hafoin akompaña arguidu na’in-sia iha TDD, segunda ne’e.
Estaqui Guterres haktuir medida TIR no Aprezentasaun Periodika ne’ebé tribunál fó ba nia kliente ne’e, proporsionál no justu tanba arguidu ne’ebé sai autór deklara abertamente ba tribunál katak nia maka halo aktu hasoru membru PSHT iha momentu ne’ebá.
Enkuantu arguidu nain-hitu seluk ne’ebé tribunál aplika TIR ne’e ho razaun momentu ne’e deskonfia de’it envolve iha kazu ne’e no arguidu ida maka minoridade tribunál deside arkiva.
Audénsia julgamentu ne’e preside hosi Juiz, Argentino Nunes, Ministériu Públiku reprezenta hosi Prokuradór Osorio Soares no arguidu sira hetan asisténsia legál hosi Defensór Públiku Estaqui Guterres no José da Costa Guterres.
Notísia relevante: Ekipa Konjunta detein suspeitu ida ba kazu tentativa omísidu hasoru membru PSHT
Jornalista: Natalino Costa
Editór : Florencio Miranda Ximenes
