DILI, 25 agostu 2022 (TATOLI)–Institutu Apoiu Dezenvolvimentu Emprezariál (IADE) iha fevereiru 2022 realiza ona kompetisaun inovativu ba da-VII no daudaun selesiona ona joven timor-oan na’in-10 sei tuir kompetisaunplanu negósiu inovativu setór turizmu iha setembru tinan ne’e.
“IADE kada tinan sempre realiza kompetisaun negósiu inovativu, ne’ebé kada tinan iha kada setór. Ami hili setór turizmu mak sai hanesan setór ida importante loos iha tinan 2022 atu joventude sira hola parte iha kompetisaun tinan ne’e. Prosesu ne’e ami lansa ona iha loron 22 fevereiru 2022 no agora tama ona iha faze akonsellamentu ba kandidatu the best ten, signifika na’in-10 di’ak liu,” Diretór Ezekutivu IADE, Filomeno Marcelino Belo, hateten ba Agência Tatoli, iha ninia knaar fatin, Bebora, kinta ne’e.
Notísia relevante: OJE 2022: IADE husu adisionál $480.000 hodi finansia inkubasaun negósiu
Daudaun ne’e IADE halo hela akompañamentu ba partisipante na’in 10 ne’e hodi sira bele kria planu negósiu, nune’e bele partisipa iha kompetisaun finál ne’ebé sei realiza iha Timor-Plaza no juri sira mai hosi reprezentante emprezáriu nasionál, akademista, no reprezentante hosi banku.
Kompetitór na’in-10 ne’e selesionadu tanba prienxe duni kritériu ne’ebé IADE atribui, katak sira-nia ideia inovativu no sira rasik iha negósiu, liuhosi aprezentasaun ne’ebé IADE rasik mak sai juri hodi avalia.
“Ami tau prioridade ba manan-na’in na’in-tolu, signifika hosi na’in-10 ne’e ami sei hili fali na’in-tolu ne’ebé di’ak liu mak sai vensedór dahuluk, daruak no datoluk. Maski nune’e ami sei atribui prémiu ba sira hanesan osan maibé montante la hanesan inklui sertifikadu,” nia akresenta.
Kompetisaun negósiu inovativu ne’e tau prioridade ba joven sira ne’ebé kreativa no vizaun klaru atu sai emprezáriu espesialmente iha setór turizmu.
Aleinde ne’e, oportunidade ne’e loke ba juventude hotu katak mai hosi munisípiu hotu maibé selesaun ikus mai hetan de’it na’in-10 hosi totál partisipante 239.
Orsamentu ba manan-na’in sira hamutuk $22.500, ne’ebé prémiu ba vensedór dahuluk $6.000, vensedór daruak $5.000, no datoluk $4.000, enkuantu na’in-hitu seluk kada ema sei simu $1.700-resin.
Enkuantu, orsamentru ba programa negósiu inovativu 2022 prevee iha Orsamentu Jerál Estadu (OJE) ho montante $400.000 resin, hosi parseiru sira hanesan Empreza Santos $25.000, no Timor Telecom $20.000.
Jornalista : Antónia Gusmão
Editora : Julia Chatarina
