DILI, 09 setembru 2022 (TATOLI) – Xefe Negosiadór Prinsipál Delimitasaun Fronteira Marítima no Terestre, Kay Rala Xanana Gusmão, hateten nia-parte hasoru ona Ministru Koordenadór ba Asuntu Polítiku, Jurídiku no Seguransa Indonézia, Mahfud MD no Ministra Negosiu Estranjeiru no kooperasaun, Retno Lestari Priansari Marsudi, kinta (08/09), hodi ko’alia kona-ba fronteira terestre entre Timor-Leste no Indonézia, maibé seidauk ramata no sei hasoru malu dala ida tan.
“Horisehik, ha’u hasoru malu ho parte Indonezia nian, maibé ha’u seidauk bele dehan ba públiku lai, tanba ami konkorda malu sei iha tempu atu ami hasoru malu dala ida-tan,” dehan Xanana iha Aeroportu Internasionál Nicolau Lobato Dili, hafoin fila hosi Indonézia sesta ne’e.
Nune’e, Xanana Gusmão husu ema hotu atu kalma no komprinde tanba Ministru Koordenadór ba Asuntu Polítiku, Jurídiku no Seguransa Indonézia, Mahfud MD no Ministra Negosiu Estranjeiru Indonézia, Retno Lestari Priansari Marsudi, daudaun ne’e sei okupadu ho asuntu G20 nian.
“Ita tenke komprinde tanba Ministru Retno sei okupada hela ho asuntu G20 nian ne’e boot tebes, ASEAN ne’e buat ketak, maibé G20 ne’e buat boot ida, tanba sira sei halo preparasaun fulan-ida no fulan-rua ne’ebé nia sei okupadu loos, ne’ebé marka fali ba loron seluk sei hasoru malu nafatin,” katak Xanana.
Entretantu, Xefe Negosiadór Prinsipál, Xanana Gusmão, antes ne’e hasoru malu ona ho Ministru Koordenadór ba Asuntu Polítika no Defeza Indonézia, Wiranto no Ministru Negósiu Estranjeiru no Kooperasaun Repúblika Indonézia, Retno Marsudi, ne’ebé iha nota prinsípiu aseitasaun ba finalizasaun fronteira terrestre.
Liuhosi asinatura aseitasaun ne’e finaliza ona fronteira terrestre iha segimentu rua hanesan Noelbesi-Citrana no Bijael Sunan-Oben.
Área Fronteira Noelbesi Citrana hanesan fronteira entre Kupang, Nusa Tenggara Timur (NTT) no Ambeno (Oé-cusse) ne’ebé hanesan área husi Timor-Leste.
Área Fronteira Noelbesi Citrana hanesan fronteira entre Kupang, Nusa Tenggara Timur (NTT) no Ambeno (Oé-cusse) ne’ebé hanesan área husi Timor-Leste.
Jornalista: Hortencio Sanchez
Editór : Florencio Miranda Ximenes
