BOBONARO, 26 setembru 2022 (TATOLI)-Xefe suku Lahomea, postu administrativu Maliana, munisípiu Bobonaro, Cirilo Mau-Leto Lopez, husu ba Ministériu Obra Públika (MOP) atu buka empreza internasionál no nasionál ne’ebé kualidade atubele kaer projetu estrada urbana kapitál Maliana ho distánsia kilómetru 23 nune’e bele hatudu rezultadu di’ak.
Xefe suku hato’o rekomendasaun ne’e tanba Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06.
Enkuantu estrada urbana Maliana pakote II, estrada prinsipál ho estimasaun valór globál $23,587.019,36.
Notísia relevante: Tinan ne’e, CNA loke konkursu públiku reabilita estrada urbana Maliana
Maibé tuir lideransa komunitária ne’e katak, Governu presiza kria uluk planu mestre ba munisípiu Bobonaro, molok implementa projetu estrada kapitál Maliana, inklui konstrusaun sira hanesan uma no seluk-tán.
“Agora estrada urbana Maliana ne’e tama ona iha lampu hijau, presiza kompañia ida-ne’ebé kualidade. Tanba tuir ha’u hatene atu halo tender (konkursu) ba kompañia planu estratéjia ne’e iha tiha ona, to’o agora Bobonaro laiha master plan, orsida ida mosu mai dehan ha’u Mak terbaik ona,” nia informa ba Jornalista sira, iha Maliana, segunda ne’e.
Autóridade lokál ne’e husu ba MOP atu aselera projetu ne’e tanba kuaze tinan 20 ona povu munisípiu Bobonaro harohan ba metebian no maromak hodi hein ninia implemetasaun.
Notísia relevante: CAFI sei aprova estrada urbana Maliana ho kilómetru 23
Maibé Governu tau uluk prioridade ba estrada sira iha hosi Manatuto ba to’o Lospalos, no munisípiu Covalima, enkuantu haree ba realidade kondisaun estrada kapitál Maliana sei nafatin hela hela ho fatuk rahun tempu governasaun Indonézia nian.
Xefe suku ne’e kestiona beibeik estrada urbana kapitál Maliana ho kilómetru 23, bainhira membru Governu sira hala’o atividade iha munisípiu Bobonaro sempre tuku meza no promete tau iha prioridade maibe to’o agora seidauk implementa.
Tuir dadus hosi diresaun estatístika munisípiu Bobonaro iha aldeia 192, suku 50, postu administrativu neen, ho totál populasaun 114,537, kompostu hosi mane 57,462, feto 57,075, ho totál uma-kain 24,591.
Notísia relevante: Governu aprova autorizasaun prosedimentu konkursu públiku reabilita estrada iha munisípiu haat
Jornalista: Sérgio da Cruz
Editór: Evaristo Soares Martins
