BAUCAU, 29 setembru 2022 (TATOLI) – Servisu Munisipál Agrikultura Baucau laiha kombustível no mina atu halo operasionál fila-rai agrikultór hodi prepara to’os iha tempu udan.
Diretór Servisu Munisipál Agrikultura Baucau, Moises Lobato Perreira, esplika, preparasaun ba tempu udan hasoru problema rua hanesan laiha oléu atu atesta ba tratór hodi fila-rai no mina ne’ebé antes ne’e hato’o ona pedidu ba nasionál no kompañia responsável seidauk distribui kada munisípiu.
“Ida-ne’e mak ami-nia problema ba preparasaun fila-rai (to’os) agrikultór nian iha époka tinan-2022 no 2023,” Diretór Servisu Munisipál Agrikultura Baucau informa ba Agência Tatoli, iha Vila Nova, kinta ne’e.
Servisu Agrikulura Baucau rasik kontinua informa ba Ministériu Agrikultura no Peska MAP), atu konsidera pedidu ne’ebé hato’o ona nune’e bele duni tempu hodi ajuda fila-rai komunidade liuliu iha área poténsia ne’ebé identifikadu ona bazea ba proposta hosi agrikultór sira.
Maske nune’e, liuhosi akordu entre autoridade suku, agrikultór konkorda atu koléjiu Dom Bosco, Fatumaca sei fila-rai komunidade iha área Gariuai, Bercoli, Venilale, Loilubo no iha área Ostico, Triloka, Darsula sei responsável hosi kompañia ACELDA.
Enkuantu postu Laga hanesan suku Atelari, Sagadate, Saelari, Samalari, Soba no Teknomata, postu Baucau vila hosi suku Tirilolo, Bucoli no Buibau, Triloka no Gariuai.
Postu Quelicai iha suku Abafala no Mulia, maske hato’o ona proposta maibé Servisu agrikultura Baucau labele responde imediatamente tanba hasoru difikuldade oléu no mina ba tratór.
“Konsekuénsia mak produsaun ba tinan-2023 nia produsaun bele tún tanba maioria área poténsia la konsege ajuda komunidade atu fila sira-nia rai,” Moises Perreira akresenta.
Diresaun agrikultura Baucau presiza oléu tipu 90 sei utiliza ba hidrolik purvolta litru 48 ba kada tratór hamutuk 14 nune’e tótal oléu hamutuk litru 672 no mina ne’ebé presiza ba operasionál tratór hamutuk litru 5.000.
Jornalista : Natalino Belo
Editór : Evaristo Soares Martins
