COVALIMA, 30 setembru 2022 (TATOLI) – Administradór Munisípiu Covalima (AMC), Francisco de Andrade la bandu joven sira ho inisitiva reabilita merkadu iha Suku Maudemo, Aldeia Caicoli, Postu Administrativu Tilomar, Munisípiu Covalima.
“Ita la bandu joven sira iha inisiativa rasik reabilita merkadu, maibé tenke identifika estatutu rai estadu ka rai privadu. Tanba, durante ne’e negosiánte sira uza hela merkadu ne’e iha kada loron kuarta. Ha’u labele dehan grupo ida mak atu hadia, tanba ba futuru nia impaktu ladun di’ak. Se karik nia reabilita ba futuru oinsa, tanba merkadu propriédade estadu”, Francisco de Andrade dehan ba jornalista siraiha Covalima, sesta ne’e.
Autoridade mós esplika, hafoin grupo sira reabilita aban bainrua merkadu ida ne’e sai grupo ida-ni’an ne’e la lós, tanba proprietária estadu ni’an tenke fila fali ba estadu.
“Maske joven sira iha rasik inisiativa, maibé ba ida-ne’e kuandu ita haree propriédade ba estadu mak iha direitu, atu harii kuandu hanesan joven sira iha inisiativa atu konstrui merkadu fó benefisiu ba sé,”
Autoritadade Lokal ne’e husu karik reabilita merkadu bainhira halo konstribuisaun reseita ruma ba joven sira ka ba estadu tanba kualker rai no propriedade estadu tenke halo negosiasaun ho estadu.
Antes ne’e iha loron tersa, 27 setembru 2022, joven sira ho inisiativa rasik reabilita merkadu iha suku Maudemo,aldeia Caicoli,postu Tilomar, munisípiu covalima.
Razaun joven ho inisiativa reabilita merkadu refere tanba durante ne’e merkadu refere abandona. Ho nune’e joven sira foti inisiativa tau ideia hamutuk hodi reabilita merkadu refere.
Koalia konaba fundu, merkadu ne’e reabilita hosi joven sira rasik,hosi postu administrativu Tilomar tomak mak halo kontribuisaun ho $1000 hodi bele sosa marterial konstrusaun ne’ebé atu uza hodi halo reabilita ba merkadu refere.
Jornalista : Celestina Teles
Editóra : Armandina Moniz
