MANUFAHI, 08 outubru 2022 (TATOLI)—Grupu feto soru-tais Sorumutuk hosi aldeia Sesurai, suku Betano, postu administrativu Same Vila, munisípiu Manufahi, hetan apoiu finanseiru ho montante $450 hosi Sekretaria Estadu Komunikasaun Sosiál (SEKOMS) hodi hala’o atividade.
“Durante ne’e ami hetan apoiu hosi parseiru Luta ba Futuru no iha tinan ne’e hetan apoiu hosi SEKOMS osan $450 hodi hala’o atividade soru-tais,” Kordenadora grupu feto soru-tais Sorumutuk Sesurai, Etelvina da Costa, informa ba Agência Tatoli hafoin akomapaña ekipa Sekretáriu Estadu Komunikasaun Sosiál, Merício Juvenal dos Reis ‘Akara’ halo vizita ba fatin atividade grupu iha aldeia Sesurai, iha sesta (07/10).
Grupu ne’e hahú ho ema na’in-15 iha tinan 2008, ne’ebé maioria feto faluk no joven ho zero finasiamentu tanba ho vontade no inisiativa de’it hodi hala’o atividade soru-tais no homan, maibé bainhira membru rua mate, grupu deside hapara atividade.
Nune’e, iha tinan 2018, grupu ho ema na’in-13 funsiona filafali hodi buka parseiru, ne’ebé iha tempu ne’ebá parseiru Luta ba Futuru hato’o prontidaun apoiu grupu ne’e hodi harii edifísiu ida no mákina ida hodi kontinua hala’o atividade. Daudaun ne’e, grupu funsiona ho ema-na’in-neen, enkuantu na’in-hitu sai.
Notísia relevante: MTKI realiza kompetisaun soru-tais ba feto foinsa’e
Aleinde ne’e, Etelvina da Costa, lori naran grupu, tuir ona formasaun soru-tais no homan iha Jogjakarta, Indonézia.
Enkuantu, Governu liuhosi Ministériu Turizmu Komérsiu no Indústria (MTKI) halo ona vizita ba grupu ne’e.
“Sira hosi MTKI foin daudaun vizita ona ami, maibé seidauk fó apoiu no formasaun ruma,” nia haktuir.
Produtu hosi grupu ne’e fa’an iha Same laran ho presu tais mane ho folin $80 no feto $70, seluk fa’an iha Dili ba Fundasaun Alola.
Aleinde ne’e, grupu soru-tais ne’e partisipa ona atividade Dili Festival Tais foin daudaun ne’e.
“Husu ba joven sira atu partisipa ativa liután ho grupu Sorumutuk Sesurai atu apreende soru-tais no homan, tanba grupu ne’e la taka dalan ba joven sira ne’ebé hakarak atu apreende,” nia hameno.
Iha fatin hanesan, Sekretáriu Estadu Komunikasaun Sosiál, Merício Juvenal dos Reis ‘Akara’, hateten, SEKOMS iha kompromisu kontinua apoiu feto potensiál sira ne’ebé mai ho nia inisiativa no kreatividade.
“Ami sei kontinua apoiu ita-boot sira tanba SEKOMS mós iha programa ida kona-ba hakbiit feto iha komunikasaun sosiál. Ho nune’e ami sei ajuda divulga ita-boot sira-nia atividade iha pájina SEKOMS atu ema hotu hatene. Tanba ho meiu ne’e bele hakbiit feto potensiál hodi hamosu planu no kreatividade barak liután,” nia dehan.
Nune’e, governante ne’e enkoraja joven feto sira hodi ativa hala’o atividade kultura.
“Joven sira tenke buka apreende mós ida-ne’e tanba mundu mileniál ida joven barak fó importánsia ba rede sosiál,”nia tenik.
Durante vizita ne’e, Sekretáriu Estadu fó sertifikadu apresiasaun ba Koordenadora grupu feto Sorumutuk Sesurai inklui nia membru sira.
Jornalista : Natalino Costa
Editora : Julia Chatarina
