DILI,12 outubru 2022 (TATOLI)— Governu liu husi Ministériu Saúde, prevee milliaun $18,312,599 ba fundu COVID-19 iha Orsamentu Jeral Estadu (OJE) 2023 .
‘’Fundu COVID-19 ne’ebé aloka ba tinan oin, ita prevee miliaun $18,312,599, hodi kontinua uza nafatin ba konstrusaun balun ne’ebé mak ita halo seidauk ramata to’o agora, nune’e ami husu kedas orsamentu atu bainhira la halo pagamentu ba tinan ne’e tau kedas iha tinan oin”, hateten Ministra Saúde, Odete Maria Freitas Belo, bainhira ramata halo audénsia ho komisaun C no F iha Parlamentu Nasionál, kuarta ne’e.
Governante ne’e afirma Ministériu Saúde nia programa prioridade iha tinan oin nafatin kontinua programa sira ne’ebé la’o ona iha tinan ne’e.
“Ita sei tau mós orsamentu ba rekursu umanu, liuliu profisionál saúde sira karik iha pandemia ka kazu ruma Ministériu saúde iha ona osan atubele selu pesoál saúde sira ne’ebé mak hala’o servisu liuliu osan ba akomodasaun no seguransa nian,” hatutan.
Iha 2022, Ministériu Saúde prevee iha fundu COVID-19 ho montante millian $39, hosi númeru ne’e gasta ona milliaun $11.9 ka 44% no iha obrigasaun milliaun $6.9.
“Siginfika ita nia ezekusaun sei ki’ik hela tanba ita haree liu ba área kontrusaun nian no mós ekipamentu médiku sira ne’ebé mak ami presiza sosa, nune’e espera fulan rua tolu ami bele hahú halo kompra hodi hadi’a ami nia ezekuzaun sira ne’e”, akresenta.
Iha orsamentu fundu COVID-19 iha anu fiskal 2022 ne’e, Ministériu saúde halo kontrusaun ICU, Laboratoriu no kuarantena sira iha munisípiu sira inklui halo pagamentu ba hahan no otél ne’ebé mak durante iha situasaun COVID-19 Ministériu Saúde kontrata.
Hanesan haktuir iha livru anexu XI planu anuál ba servisu no entidade setór saúde públiku administrativu ba tinan 2023, Ministériu saúde iha programa 805, atividade 19 no sub-programa hitu.
Alende ne’e, garante kuarentena adekuada , identifika kazu COVID-19, halo izolamentu no tratamentu ba kazu COVID-19, reforsa medida distansiamentu sosiál, apoia operasaun prevensaun no mitigasaun, planu kontijénsia ba prevensaun COVID-19, vasinasaun no prevensaun COVID-19.
Jornalista : Felicidade Ximenes
Editór : Florencio Miranda Ximenes
