DILI, 13 outubru 2022 (TATOLI)–Primeiru-Ministru (PM), Taur Matan Ruak, hateten, nia parte prefere ezekusaun Orsamentu Jerál Estadu (OJE) Retifikadu 2022 ho montante $3.224.476.697,06 la’o neneik maibé kualidade do que lalais maibé la hatene gasta ba saida de’it.
“Ha’u-nia prinsípiu ha’u defende ezekusaun di’ak, la’ós ezekusaun de’it bele gasta tun gasta sa’e, ezekuta hotu loos ona. Uluk bainhira ha’u sei Prezidente Repúblika, ha’u krítika Governu anteriór hateten katak, imi husu osan hira mak gasta no nunka husu gasta ba saida entaun ezijénsia ida-ne’e mak agora tenke halo, gasta ba saida no gasta di’ak,” Xefe Governu hateten hafoin ramata reuniaun semanál ho Prezidente Repúblika, iha Palásiu Prezidensiál, Bairru-Pité, kinta ne’e.
Notísia relevante: Governu ezekuta ona OJE Retifikativu 2022 biliaun $1,1
Xefe Governu dehan, ezekusaun neneik ho kualidade, karik ezekuta ka gasta la hotu bele filafali ba kofre Estadu.
Iha Sorin seluk, Vise-Ministru Finansa, António Freitas, hateten, ezekusaun OJE tinan 2022 sei kiik tebes tanba hasoru difikuldade.
“Públiku kestiona katak tanba saida mak ezekusaun orsamentu ne’e kiik liu, maibé ha’u husu atu lalika haree ba ezekusaun ein termu persentajen maibé tanba Governu opta orsamentu ida-ne’e hanesan orsamentu bazeia ba programa. Ha’u tenki ko’alia onestu katak ita enfrenta problema duni, tanba saida mak foin atinje 38,4% de’it, ita iha fundu veteranu ne’ebé prepara hela dokumentu sira molok implementasaun no programa Cesta Bázika iha ezekusaun laran,” nia dehan.
Problema seluk mak iha fundu infraestrutura, bele hateten katak tanba saida mak fundu infraestrutura ne’e la implementa lalais, tanba PM Taur orienta katak kualker projetu ne’ebé ba konkursu tenke iha estudu no mós dokumentu tékniku sira ne’ebé looos ona no kualker konkursu ne’e iha dokumentu no estudu molok implementa projetu.
Bazeia ba ezekusaun iha Portál Transparénsia, katak ezeksaun OJE Retifikativu 2022 iha kategoria saláriu no vensimentu ezekuta ona $88.068.078 (67,3%) hosi orsamentu alokadu 270.050.717, sasán no servisu ezekuta ona $159.320.299,18 (52,5%) hosi orsamentu alokadu $525.594.767,06, kapitál menór $6.732.990,26 (36,5%) hosi orsamentu alokadu $53.362.229,57, kapitál dezenvolvimentu ezekuta ona $294.536.294,25 (24%) hosi orsamentu alokadu $459.813.145,63, enkuantu transferénsia públika ezekuta ona $1.172.139.816,58 (34,8%) hosi orsamentu alokadu $1.906.965.126,95, no despeza konstijénsia ezekuta ona $3.575.489,74 (57%) hosi orsamentu alokadu $8.690.710,85.
Jornalista : Antónia Gusmão
Editora : Julia Chatarina
