DILI, 17 outubru 2022 (TATOLI)—Prezidente kompañia ALGO TITPDV Lda, Angelo Aitara Algo, tersa ne’e, hasoru malu ho Prezidente Repúblika (PR), José Ramos Horta, hodi aprezenta empreza nia planu investimentu iha área peska.
“Ohin, ami mai hasoru Prezidente Repúblika hodi ko’alia ami-nia planu iha área investimentu ba peska nian,”Angelo Aitara Algo hateten ba jornalista sira hafoin ramata enkontru ho Prezidente Repúblika, José Ramos Horta, iha palásiu prezidensiál Nicolau Lobato, Bairru Pite, Dili.
Empreza ne’e prevee investimentu ho millaun $2 ba indústria peska no mós sei dezenvolve área seluk akuakultura haki’ak ikan, atividade merkadória doméstika no internasionál ba investimentu ne’e rasik.
Empreza ne’e iha ona kontratu no halo parseria ho nasaun Xina hodi ró 10 ba dahuluk ne’ebé tuir planu iha novembru ne’e sei to’o iha Timor-Leste, hodi hahú hala’o atividade peska ka’er ikan, faze dahuluk atividade hahú sei emprega traballador na’in-200.
“Nune’e konvida Prezidente Repúblika atu partisipa serimónia simu ró ne’ebé tuir planu sei to’o iha meadu fulan-novembru tinan ne’e,” nia dehan.
Na’in ba empreza ne’e hateten, iha komitmentu forte atu dezenvolve investimentu peska oinsá kontribui ba kriasaun kampu traballu, hasae kresimentu ekonómiku no redusaun ki’ak.
“Ami halibur an iha ekipa ida desde tinan rua ba kotuk tenta formula oinsá ajuda nasaun liu hosi dezenvolve ida papél iha área peska nian, nune’e mehi ba oin hakarak sai nasaun ida-ne’ebé iha kualidade no kapasidade peska nian ba iha merkadu,” nia hateten.
Empreza mós hanoin atu transforma peskadór timoroan ne’ebé ho ro ki’ik nune’e sei injenta orsamentu ruma ba de’it peskadór sira, atu nune’e eleva sira-nia moris hanesan peskadór. Aleinde kaer ikan empreza mós hanoin ba futuru loké indústria fabrikasaun iha rai-laran rasik.
Tuir istimasaun investimentu ba dahuluk sei emprega traballador na’in-200 no to’o ba longu prazu bele emprega traballadór por volta rihun 1500 ba leten.
Nune’e, Prezidente ba empreza ne’e, hein katak ho apoiu Xefe Estadu nian no ema hotu nune’e atividade ne’e bele hala’o hodi kontribui ba kriasaun kampu traballu.
Durante sorumutu, PR hateten tanba investimentu sira hanesan balun halo tiha ona hosi Xina nian depois ikus mai iha fallansu balun tanba ne’e presiza tetu didi’ak.
Jornalista : Nelson de Sousa
Editór : Cancio Ximenes
