DILI, 19 outubru 2022 (TATOLI)–Koordenadór Eskola Ensinu Báziku Filiál (EBF) Bidau Masaur, José Gusmão, husu ba Ministériu Edukasaun, Juventude no Desportu (MEJD) atu halo intervensaun imediata ba komunidade lubuk ida ne’ebé halo uma iha propriedade rai eskola nian.
“Ha’u halo beibeik ona intervensaun, tanba ha’u hatene rai ida agora komunidade no ita nia membru órgaun soberanu balun hela ne’e propriedade Estadu nian ne’ebé indika ba eskola EBF Bidau Masaur”, José Gusmão ba ajénsia Tatoli iha ninia knaar fatin eskola EBF Masaur, kuarta ne’e.
Nia dehan haruka ona karta ba MEJD liuhosi Diresaun Servisu Edukasaun Munisípiu Dili atu halo intervensaun imediata.
José Gusmão haktuir intervensaun ne’ebé parte eskola halo desde inísiu ukun-an to’o diresaun terras no propriedade, maibé to’o agora laiha reasaun.
“Iha 2016 ha’u haruka karta ba ministériu edukasaun atu hakotu prosesu arrendamentu ne’ebé parte balun halo iha rai ne’e, maibé la hetan resposta, buat hotu iha inserteza nia laran to’o ikus mai mosu desizaun balun ne’ebé maka foti hosi eis sekretáriu estadu terras hodi fó filafali lisensa ba komunidade sira atu kontinua halo konstrusaun iha rai refere, tanba ne’e maka sira kontinua halo fali konstrusaun”, nia hatutan.
Nia kestiona: “Ha’u la komprende komunidade sira iha eskola seluk ne’ebé okupa área eskola, hetan ona notifikasaun hosi terras tenke sai, tanbasá maka komunidade okupa rai EBF Masaur hetan fali lisensa hodi bele halo tan konstrusaun iha rai eskola”.
Diretór Servisu Edukasaun Munisípiu Dili, Carlito da Silva, rekoñese simu ona karta ida konaba preokupasaun hosi koordenadór EBF Masaur.
“Ha’u husu ba komunidade sira atu hamamuk área eskola no fasilidade eskola sira, buat ne’ebé laloos ita nian tenke deklara ho loloos, labele mai okupa fali sasán Estadu nian depois deklara katak lakohi sai ne’e laloos”, afirma.
Hanesan inan aman ne’ebé komprende didiak lei sira la presiza Estadu mak mai hasai, tenke iha konsiénsia hodi sai rasik de’it. Ida ne’e maka dehan timor-oan, iha duni nasionalizmu no patriotizmu.
Tuir informasaun ne’ebé jornalista Tatoli rekolla, rai ne’e mamuk durante tinan barak, tanba ne’e maka komunidade sira okupa hodi halo uma privadu ba sira hela. Enkuantu hosi parte eskola, rai ne’e sei harii eskola ho nivel pre-eskolár.
Jornalista : Tomé Amado
Editora : Rita Almeida
