DILI, 21 outubru 2022 (TATOLI)—Ministériu Saúde (MS) alerta ba sidadaun hotu katak produtu ai-moruk xarope kontamidadu ne’ebé Organizasaun Mundiál Saúde (OMS) konsidera la tuir padraun seidauk tama lista farmséutiku iha Timor-Leste.
Diretór Naisonál Farmásia no Medikamentu iha Ministériu Saúde, Delfim Ferreira, informa Timor Leste seidauk rejistu iha sistema medikamentu kona-ba aimoruk xarope ba labarik sira ne’ebé kontamina ona iha rejiaun asiátiku.
“Ita seidauk rejistu aimoruk ne’e husi nasaun Índia iha ita nia sistema medikamentu nian,” hateten Diretór ne’e ba Agencia TATOLI via telefónika, sesta ne’e.
OMS alerta ona katak produtu ai-moruk xarope ne’e ba labarik sira, maibé kontamina ona, iha ne’ebé identifika iha nasaun Gambia Rejiaun Afrika no Indonézia.
Ai-moruk ka medikamentu ne’e la inklui iha espesifikasaun no la tuir estandar mak hanesan, 1).Promethazine Oral Solution BP, Númeru batch: ML 21 – 02, Fábrika: MAIDEN PHARMACEUTICALS LIMITED (Haryana, India); 2) Kofexmalin Baby Cough Syrup (Pheniramine Maleate, Ammonium Chloride, Menthol), Númeru batch: ML21-199, Fábrika : MAIDEN PHARMACEUTICALS LIMITED (Haryana, India); 3). Makoff Baby Cough Syrup (Chlorphenamine Maleate, Phenyleprine HBR, Dextromethorphan syrup), Númeru batch: ML21-203, Fábrika : MAIDEN PHARMACEUTICALS LIMITED (Haryana, India), no 4). Magrip N Cold Syrup (Paracetamol Phenyleprine HCL, Chlorphenamine Maleate), Númeru batch: ML21-198, Fábrika : MAIDEN PHARMACEUTICALS LIMITED (Haryana, India).
“Ai-moruk tipu haat ne’e ba bebé sira idade tinan lima mai kraik, ne’ebé bainhira konsumu bele kauza ba labarik sira nia rins no iha evidénsia mak hamate ona labarik hamutuk 70 iha Afrika Gambia no iha Indonézia hamutuk 20’, akresenta.
Nune’e, Ministériu Saúde alert aba sidadaun iha territóriu nasionál hotu atu labele tauk no paniku ba informasaun ne’e tanba medikamentu ne’e seidauk tama Timor-Leste.
“Ami mós halo ona karta ba importadór medikamentu iha Timor laran atubele informa karik sira hetan produtu ne’e bele suspende no labele importa mai Timor ka komersializa iha Timor,”katak.
Diresaun Nasionál Farmásia no Medikamentu nu’udar Autoridade Reguladór Nasionál (NRA), la deteta produtu ai-moruk tipu haat iha armazen SAMES nomós iha setor privadu sira tanba produtu hirak ne’e la rejistu iha Ministériu Saúde Timor-Leste.
Iha diferensa númeru fornada ‘batch number’ ne’ebé mak agora dadaun uza hela iha fasilidade saúde no la hanesan ho ai-moruk ne’ebé deteta iha nasaun Gambia.
“Ai-moruk Promethazine Syrup ne’ebé mak agora dadaun uza iha fasilidade saúde ne’e lahanesan ho aimoruk Promethazine ne’ebe identifika iha Gambia Rejiaun Afrika no nasaun viziño Indonézia”.
Produtu ida ne’ebé utiliza iha fasilidade saúde hotu iha territóriu tomak mak Promethazine Hydrochloride Oral Solution USP 5mg/5ml, Númeru batch: 2PE01018, Fábrika: Ciron Drugs & Pharmaceuticals Pvt, Ltd. Plot No. 35 to 3, 43 to 45, CFC-B, Dewan Udyog Nagar, Aliyali, Palghar, Dist. Palghar – 401 404, India.
Jornalista: Felicidade Ximenes
Editór : Florencio Miranda Ximenes
