DILI, 24 outubru 2022 (TATOLI)—Diretór Ezekutivu Centro Naacional Chega (CNC), Hugo Maria Fernandes, hateten iha proposta Orsamentu Jerál Estadu (OJE) 2023, CNC prevee orsamentu hamutuk $2.188.000.
“Tinan oin, ita iha $2.188.000. Hosi ne’e, ami-nia planu prioridade nafatin, la’o tuir prioridade Governu nian iha tinan 2023. Dahuluk, prezervasaun istória ne’e kontinua inklui prezervasaun memória pasaada. Aleinde ne’e, apoiu uma ba sobrevivente sira, hanesan iha tinan ne’e ita halo uma lima (5) maibé ita sei hetan atribuisaun uma hosi Uma Kbiit Laek 450 no agora ita prosesa hela,” Hugo Maria Fernandes hateten ba jornalista sira, iha salaun CNC, Antigu Komarka, Balíde, Dili, segunda ne’e.
Aliende, iha tinan 2023 ne’e mós CNC kontinua halo diseminasaun informasaun liu-liu foku ba Arte Marsiál sira.
CNC kontinua halo programa reparasaun sira inklui pagamentu pontuál ba sobrevivente sira no tratamentu saúde mentál no mós saúde fizika. Aleinde ne’e, fó apoiu rekuperasaun ekonomia ba sobrevivente sira.
Maibé ba dezenvolvimentu arkivu iha tinan oin CNC halo pedidu adisionál, tanba tinan oin CNC nia osan konstrusaun hasai tiha maibé foin dadaun audiénsia ho Komissaun A, CNC halo fali proposta se bele hatama fali no hein katak sei hetan aprovasaun sentru arkivu bele harii, nune’e CNC bele kontinua halo.
Atividade seluk mak dijitalizasaun ba arkivu sei kontinua no peskiza komunidade ida istória ida sei kontinua.
“Normálmente ita sei kontinua nafatin programa sira-ne’ebé iha, só muda fatin,” nia esplika.
Jornalista : Nelia Fernandes
Editór : Cancio Ximenes
