DILI, 28 outubru 2023 (TATOLI)—Autoridade Nasionál Komunikasaun (ANC, siglá portugés), prosesa hela lisensa spectrum ba empreza Kacific Broadband Satellite hosi Singapura atu investe iha setór satélite ínternet iha Timor-Leste.
Notísia Relevante: Empreza hosi Singapura hakarak investe iha área satélite ínternet
Prezidente Autoridade Nasionál Komunikasaun, João Olívio Freitas, akompaña mós Diretór Ezekutivu Kacific Broadband Satellite, Hugo Filipe Martins, hasoru malu ho Prezidente Repúblika (PR), José Ramos Horta, hodi atualiza prosesu refere.
“Hetan konvite hosi Prezidente Repúblika ko’alia investimentu privadu iha setór telekomunikasaun ligadu ho operadór ne’ebé rejistu ona hetan ona sertifikadu iha ANC hanesan Kacific ninian, ne’ebé reprezenta mós nia Diretór Ezekutivu oinsá aselera prosesu ida atu liu-liu lisensiamentu spectrum ba iha Kacific, hodi nune’e sira bele hala’o operasaun iha tempu badak,” Prezidente ANC hateten ba jornalista sira hafoin ramata enkontru ho Xefe Estadu, José Ramos Horta, iha Plásiu Prezidensiál Nicolau Lobato, Bairru Pite.
Nia hatutan, tanba Kacific iha interrese ida atu hala’o serbisu liu-liu fornesimentu internet via satélite ba iha área remota sira.
Prezidente Repúblika sente haksolok tebes rona ida-ne’e no parte ANC hanesan reguladór prontu atu apoiu liuhosi fornesimentu spectrum tuir prosedimentu ne’ebé iha.
Kacific rejista ona iha ANC hanesan operadór agora faze tuir mai tanba operasaun ba fornesimentu internet via satélite sei utiliza rekursu telekomunikasaun spectrum entaun prosesu tuir mai empreza ne’e sei hakat fali ba iha lisensamentu spectrum.
“Nune’e prosesu ne’e Kacific hatama ona pedidu ba ita prosesa daudaun,” nia dehan.
Nune’e, Prezidente ANC espera katak bainhira lisensiamentu spectrum ne’e loos ona empreza bele hahú ona fornese serbisu internet ba área rurál sira.
Notísia Relevante: ANC atribui lisensa espektru frekuénsia adisionál ba operadór telekomunikasaun tolu
Jornalista : Nelson de Sousa
Editór : Cancio Ximenes
