DILI, 19 novembru 2022 (TATOLI)—Partidu Sosialista Timor (PST) fó tomada de pose ba kuadru prinsipál sira hosi munisípiu Bobonaro, Covalima no Rejiaun Administrativa Espesiál Oé-Cusse Ambeno (RAEOA) atu organiza partidu hodi apoiu partidu Congresso Nacional de Reconstrução Timorense (CNRT) ka Xanana Gusmão iha tinan 2023.
“Ami ohin fó tomada de pose ba kuadru prinsipá sira hosi munisípiu Bobonaro, Covalima no RAEOA, nune’e sei dada bandeira PST no CNRT iha munisípiu sira nune’e oinsá bele apoiu ba ita-nia maun boot Kayrala Xanana Gusmao,” Prezidente Partidu Sosialista Timor (PST) Avelino Coelho, hateten ba jornalista sira iha salaun CNE, Caicoli, sábadu ne’e.
Eleisaun parlamentár 2023, PST sei hein desizaun oinsá atu la’o ba oin ho modelu saida mak foti no oinsá halo konsolidasaun muda prespektiva atu fó apoiu ba Xanana Gusmao tanba PST hanesan partidu aliadu ida.
“Partidu PST durante ne’e organiza nafatin, la’ós atu ba eleisaun mak organiza malu tanba organizasaun partidaria ne’e kada tinan no konsolida demokrasia mezmu la liu bareira, tanba ne’e prepara an atu ba elisaun parlamentár tinan oin no importante mak ko’alia kona ba povu nia problema,” nia dehan.
Tanba ne’e, Presidente Partdiu Soaislaista Timor (PST) iha segundu konferénsia nasionál sei ko’alia kona-ba ema dezempregu, dada kadoras ba kosta súl no ikus mak sei fó formasaun ba kuadru politiku sira.
Militante Partidu Soasialista Timor (PST) munisípiu Bobonaro, Domingos Doutel Soares, informa durante tinan 2000 sai hanesan komisaun politika iha partidu Fertilin iha postu adminsitrativu Dom Aleixo no iha tinan 2012 resizna-an hodi tama fila-fali iha partidu PST to’o ohin loron.
“Ha’u mai partidu PST ho livre vontade, ha’u mai la’ós buka kadeira maibé ha’u mai atu hadi’a rai ida-ne’e, tanba ha’u hosi Fretilin iha 2000 iha komisaun politika postu adminsitrativu Dom Aleixo nian to’o tinan 2012 hau resigna-an. No, ha’u haree tempu ona atu fila-fali mai PST, nune’e apoiu ha’u-nia komandante em xefe Xanana Gusmão iha tinan 2023 tenke fila ba Primeiru-Ministru hodi ukun rai Timor ne’e ba oin,” Domingos Doutel Soares hateten.
Jornalista : Felicidade Ximenes
Editór : Cancio Ximenes
