COVALIMA, 29 novembru 2022 (TATOLI)–Tékniku Informasaun Teknólojia (IT) Ministériu Solidariedade Sosiál no Inkluzaun (MSSI) fó firmasaun utiliza tablet android ba ekipa pagamentu subsídiu fim do ano $200 ba uma kain atu selu benefisiáriu sira iha Covalima.
Notísia Relevante: MSSI deside data tentativa pagamentu subsídiu $200 iha 06 dezembru
“Ami huoi ekipa IT hodi fó formasaun utiliza tablet android atu hala’o pagamentu subsídiu fim do ano $200, atu haree no hatene totál númeru subsídiu uma-kain sira ne’e. Karik balun la simu hanesan iha suku balun númeru uma kain hira mak la simu no hira mak simu ona,” Tékniku IT MSSI, Rigoberto Fernando, informa ba Agência Tatoli, iha salasaun Sentru Solidariedade Sosiál Suai Loro, tersa ne’e.
Pagamentu utiliza tablet android maske depende de’it ba rede internet hanesan iha área rurál sira laiha rede, maibé iha tablet android ne’e rasik xave ona formuláriu no bainhira iha ona rede internet entaun server iha nasional bele asesu kedas.
Formasaun ne’e hala’o durante loron rua ne’ebé hahú iha tersa (29/11) ohin, ko’alia matéria oinsá ekipa pagamentu atu rejistu benefisiáriu sira-nia naran, númeru eleitorál, bainhira reprezentante mak mai tenke prenxe deklarasaun ne’ebé prepara hosi ekipa sekretariadu no xefe suku sira mós prenxe deklarasaun no asina.
Formasaun ba loron loron daruak, iha kuarta (30/11) aban, sei ko’alia matéria kona-ba utiliza tablet android nune’e ekipa pagamentu sira bele iha koñesimentu di’akliu oinsá bele utiliza tablet android ne’e rasik.
Partisipante sira-ne’ebé tuir formasaun ne’e mak pontu fokál sentru solidariedade sosiál, funsionáriu hosi Ministériu Administrasaun Estaáal (MAE) iha munisípiu Covalima tanba funsionáriu hirak ne’e mak sei tuun ba terrenu atu halo pagamentu.
Diretór Sentru Solidariedade Sosial Covalima, Agapito Asis, reforsa Tékniku IT hosi MSSI fó formasaun ne’e relasiona Governu nia polítíka atu halo pagamentu subsídiu fim do ano $200 ba uma kain sira.
“Atividade ohin fó formasaun hanesan parte ida hosi prosesu pagamentu subsídiu fim do ano $200. Formasaun ida-ne’e importante ba ita-nia ekipa pagamentu sira, oinsá iha koñesimentu kona-ba prosesu pagamentu utiliza tablet android,” nia hateten.
Formasaun utiliza tablet anbdroid ne’e partisipa hosi tékniku sira hosi funsionáriu administrasaun estatál (MAE) sira no MSSI servisu hamutuk bele implementa tuir kompeténsia ne’ebé sira iha.
Antes ne’e, iha loron 26 setembru 2022), Diretór Apoiu Organizasaun Noun Governamentál Covalima, Agostinho Mendonça “Ran nakali”, relata dadus benefisiáriu ne’ebé asesu subsídiu fim do ano $200 iha munisípiu Covalima hamutuk na’in-18,573 no aumenta ho lista adisionál 1.805.
Notísia Releveante: MSSI husu membru família saláriu liu $500 rezeita simu subsídiu $200
Jornalista : Celestina Teles
Editór : Cancio Ximenes
