DILI, 09 dezembru 2022 (TATOLI)- Empreza Aero Dili, loke-tán vou komersiál nível Internasionál, kompara ho antes ne’e vó doméstiku de’it ho Rute Dili-Covalima no Dili-Rejiaun Administrativa Espesiál Oé-cusse-Ambeno (RAEOA).
Diretór Empreza Aero Dili, Lourenço de Oliveira, informa, dadaun ne’e ekipa tékniku sira halo hela preparasaun no aviaun refere halo hela inspesaun jerál iha Malázia hafoin ne’e troka makina (machine) foun iha Tailándia, nune’e iha fulan-janeiru 2023 to’o iha Timor-Leste.
Rute aviaun ne’e sei semo Timor-Leste ba nasaun sira ne’ebé mak iha ona ASA (Air Services Agreement-Akordu Servisu Aéreu).
“Atu informa ba públiku katak, iha fulan-janeiru iha ita-nia rain ha’u foti aviaun ida para bele halo rute Internasionál ba fatin ne’ebé mak ema sira seluk bele semo mai no ita mós bele semo filafali ba, atu hateten katak, ita mós bele ona, labele ema de’it mak mai foti maibé ita mós tenke ba fali sira-nia rain”, Lourenço de Oliveira, hateten, liuhosi konferénsia imprensa, iha Aeroportu Internasionál Comoro, sexta ne’e.
Nia hatutan, Aero Dili mós prepara instrutór pilotu na’in-tolu, mai hosi Eropa, Korea no Indonézia. Nune’e mós mekániku sira, ne’ebé esperiénsia servisu Aérea balun tinan 18, no balun tinan 22; tékniku hirak ne’e mak sei fó asisténsia ba Aero Dili.
“Iha fulan-janeiru sei iha uluk aviaun ida, liu fulan-neen sei iha tan ida, no tinan rua sei mai tan ida, pelu menus aviaun tolu ne’e ba Timór to’o ona. Kapasidade aviaun ne’e bain-bain akumula pasajeiru 180, maibé ida ha’u-nian ne’e hatun tiha ba 165, para ema tuur luan uitoan sé lae tur sena malu liu”, nia esplika.
Ligadu ho prosedimentu legál sira hanesan lisensa no seluk-tán, emprezáriu Timoroan ne’e adianta katak, prosedimentu saida de’it kompletu hotu ona. Enkuantu kona-ba Aeromosa (pramugari), iha faze inísiu sei uza lai aeromosa estranjeiru durante fulan-neen, depois ida ne’e halo rekrutamentu ba aeromosa Timoroan, nune’e mós Pilotu.
“Atu ko’alia uitoan molok to’o iha faze sira ne’e primeiru ha’u ba eskolla uluk sai pilotu, depois ha’u hola aviaun ki’ik sira durante tinan lima vou doméstika, depois mak ha’u hanoin atu ba ida boot ne’e. Dadaun ne’e mós, ha’u aluga hela aviaun rua, aviaun Air Ásia ho Sriwijaya ne’e ha’u mak aluga hela mai Timór durante tinan ida-resin ona, ne’ebé ideia mais ou menus hakarak iha aviaun rasik ne’e bele hala’o ona”, nia otimista.
Lourenço subliña, tanba aviaun ninian rasik entaun presu billete tenke kompetetivu.
“Maibé buat hothotu depende ba mina, kuandu mina sa’e folin hasa’e sé mina tun folin mós hatun”, nia garante.
Dadaun ne’e ekipa Aero Dili nian hamutuk na’in-60, kompostu hosi Aeromosa, Pilotu, ekipa jestaun, finansa ho seluk-tán.
Jornalista : Antónia Gusmão
Editór : Rafael Ximenes de A. Belo
