OÉ-CUSSE, 27 dezembru 2022 (TATOLI)–Konstrusaun ba Uma Kbiit Laek (UKL) faze daruak tuir Programa Nasionál Dezenvolvimentu Suku (PNDS) iha Rejiaun Administrativa Espesiál Oé-Cusse Ambeno (RAEOA), ninian progresu iha implementasaun atinje ona pursentu 43,31 hosi unidade 168 iha rejiaun ne’e.
Diretór PNDS iha RAEOA, Tomas Boquifai, haktuir hosi unidade 168 ne’e ninian progresu tarde iha sub-rejiaun Pássabe, suku Malelat no Lakufoan iha Pante Makasar, tanba udan no kondisaun estrada difikulta transporte atu transporta materiál to’o iha fatin.
“Servisu balu taka ona uma kakuluk, balu to’o sinta leten, ne’ebé ita garante to’o fevereiru 2023 ita bele halo ona inaugurasaun,” Tomas Boquifai ba Agência Tatoli iha Oé-Cusse, tersa ne’e.
Nia informa mós katak, suku 18 hosi unidade 168 ne’ebé governu sentrál oferese, falta aldeia Usapikolen iha suku Bobometo maka sei verifika fali benefisiáriu foun tanba komunidade balun la satisfas ho benefisiáriu ne’ebé hetan direitu UKL ba faze daruak.
Montante orsamentu ba projetu UKL faze daruak nian, diretór ne’e la esplika detalla maibé bazea mata-dalan iha tipu rua, kada uma ho metru kuadradu 61 hetan valór orsamentu hamutuk rihun $17 no ba uma metru kuadradu 54 ne’e nia valór orsamentu hamutuk $16,500.
Antes ne’e, Governu liuhosi Ministériu Administrasaun Estatál (MAE) fó sai kona-bá UKL faze daruak iha territóriu nasionál kobre ba suku 424 hamutuk uma 4.000 ho baze orsamentu millaun $71, ne’ebé prevee hosi Orsamentu Jerál Estadu (OJE) 2022 nian.
Notísia relevante: PNDS RAEOA submete ona lista benefisiáriu UKL faze daruak
Jornalista : Abílio Elo Nini
Editora : Rita Almeida
