DILI, 29 dezembru 2022 (TATOLI)– Kaleidoskópiu Ministériu Finansa (MF) tinan 2022 iha área reforma jestaun finansa públika.
Iha loron 10 janeiru, Parlamentu Nasionál aprova proposta lei Enkuadramentu Orsamentu Jerál Estadu no Jestaun Finanseira Públika iha finál globál, ho 37 votu a-favór no abstensaun 2.
Iha 18 janeiru, dekretu Governu númeru 13/2022 kona-ba Ezekusaun Orsamentu Jerál Estadu (OJE) 2022.
Iha 09 fevereiru, Prezidente Repúblika, Francisco Guterres ‘Lú Olo’ promulga Lei Enkuadramentu Orsamentál no Jestaun Finanseira Públika. Lei estruturante ne’e substitui lei númeru 13/2009, 21 outubru, Orsamentu no Jestaun Finanseira ne’ebé iha ona vijénsia liu tinan 10 nia laran.
“Ho promulgasaun ne’e, Timor-Leste marka pasu importante ba dahuluk iha área Reforma Jestaun Finanseira Públika. Konkista importante ida ne’ebé VIII Governu Konstitusionál lideradu hosi Primeiru-Ministru, Taur Matan Ruak, halo durante nia mandatu,” refere nota ne’ebé Agência Tatoli asesu, kinta ne’e.
Iha 26 abril, MF realiza jornada planeamentu, ne’ebé faze dahuluk hosi prosesu elaborasaun proposta OJE 2023. Jornada planeamentu ne’e mak ba dahuluk iha istória Timor-Leste hafoin país ne’e restaura ninia independénsia iha tinan 20 liubá.
Iha 11 maiu, Prezidente Repúblika, Francisco Guterres ‘Lú Olo’, promulga Rejime Jurídiku Aprovizionamentu, Kontratu Públiku no nia Infrasaun. Dekretu-lei ne’e troka rejime jurídiku atuál tolu (Rejime Jurídiku Aprovizionamentu, Rejime Jurídiku Kontratu Públiku, no Infrasaun Administrativa sira), ne’ebé aprova iha tinan 2005 no iha ona vijénsia durante tinan 17 nia laran. Diploma ne’e simplifika prosedimentu aprovizionamentu hosi tipu prosedimentu hitu ba tolu de’it no sei hahú vigora iha loron 1 fulan-Janeiru 2023.
Iha 11 maiu, dekretu Governu númeru 18/2022 kona-ba ‘Programas Orçamentais’ hodi fasilita ezekusaun Orsamentál 2023. Iha 11 maiu, Dekretu Governu númeru 19/2022 kona-ba ‘Classificadores Orçamentais’ hodi fasilita ezekusaun orsamentál 2023. Iha 18 maiu 2022, Prezidente Repúblika, Francisco Guterres ‘Lú Olo’ promulga lei OJE Retifikativu 2022.
Iha 10 juñu, realiza reuniaun TLDPM 2022. Prezidente Repúblika, José Ramos Horta nu’udar ‘Convidado de Honra’ no oradór prinsipál iha reuniaun ne’e. MF aprezenta ba Parseiru Dezenvolvimentu esbosu Estratejia Reforma Jestaun Finansa Públika 2022 – 2027.
Iha 13 juñu, Prezidente Repúblika, José Ramos Horta, promulga ‘Lei das Grandes Opções do Plano para 2023’.
Iha 30 juñu, MF realiza jornada orsamentál, faze segundu hosi prosesu elaborasaun proposta OJE 2023.
Iha 3 outubru, Governu aprezenta proposta-lei OJE 2023 ba Prezidente Parlamentu Nasionál, Aniceto Longuinhos Guterres Lopes. Iha 17 novembru, Parlamentu Nasionál aprova iha finál globál proposta OJE 2023.
Iha 20 dezembru, Parlamentu Nasionál liuhosi sesaun plenária, aprova iha finál globál proposta reformulasaun dekretu Parlamentu Nasionál númeru 68/V kona-ba OJE 2023 ho montante totál $2.155.715.306 ho votu a-favór 40 (67%), kontra 0, no abstensaun 20.
Iha 21 dezembru, Prezidente Repúblika promulga OJE 2023 no publikasaun lei OJE 2023 iha Jornál Repúblika.
Iha 28 dezembru, MF aprezenta ba Konsellu Ministru esbosu Estratejia Reforma Jestaun Finansa Públika 2022 – 2027.
Jornalista : Antónia Gusmão
Editora : Julia Chatarina
