DILI, 20 janeiru 2023 (TATOLI)—Governu liuhosi reuniaun interministeriál sesta ne’e, deside halo prolongasaun ba programa distribuisaun Cesta Bázika to’o 31 marsu 2023 iha territóriu laran ho objetivu atu benefisiáriu bele simu hotu sira-nia direitu.
Ministru Turizmu Komérsiu no Indústria (MTKI), José Lucas do Carmo da Silva, hateten, reuniaun interministeriál refere lidera hosi Ministériu Koordenadór Asuntu Ekonómiku (MCAE, sigla portugés), partisipa mos hosi Sekretáriu Estadu Kooperativa (SEKoop), Elizário Ferreira, inklui koordenadór Cesta Bázika sira seluk.
“Objetivu ohin ita halo enkontru ne’e, ita tau hanoin hamutuk halo prologamentu ba programa distribuisaun Cesta Bázika ne’e, nune’e ita-nia benefisiáriu hotu bele hetan sira-nia direitu. Ne’ebé desizaun ne’ebé ohin ita foti ne’e aumenta tempu to’o 31 marsu 2023,” José Lucas do Carmo da Silva, hateten, iha TradeInveste, Colmera, Dili.
Membru Governu ne’e, dehan, ezekuasaun distribuisaun Cesta Bázika ne’ebé daudaun ne’e distribui iha territóriu laran no parte MTKI atinje ona 90% no parte SEKoop nia atinjementu to ona 70%. Ho razaun ida ne’e mak Governu deside aumeta tan tempu atu komunidade ne’ebé seidauk hetan sira-nia direitu bele simu hotu.
“Kona-ba dadus reklamante ita seidauk iha dadus tanba, daudaun ne’e programa distribuisaun sei iha prosesu nia-laran no kuaze iha 30% ka 40%, la’o hela, ne’ebé bainhira distribuisaun hotu ona mak ita foin hatene iha númeru reklamante ne’e hira,” nia hateten.
Jornalista : Arminda Fonseca
Editora : Armandina Moniz
