COVALIMA, 24 janeiru 2023 (TATOLI)–Komisaun Nasionál Eleisaun (CNE-Sigla Portugés) sei halo rekrutamentu ofisiál CNE na’in-120 hodi prepara ba eleisaun parlamentár maibé sei hein desizaun hosi nasionál.
“Iha Covalima ita sei halo rekrutamentu ba ofisial supervizór eleitorál 120 atu destaka iha sentru votasaun no estasaun votasuan ne’ebé estabelese iha Covalima,” Diretór CNE Covalima, Hermenegildo de Sena, hatetetn ba Agência Tatoli iha Kampung Baru, tersa ne’e.
Preparasaun CNE ba eleisaun parlamentar ne’ebé atu halo rekrutamentu ba ofisiál CNE atu superziona eleisaun parlamentar tinan 2023, maibé CNE covalima sei hein desizaun hosi nasionál.
Iha Covalima seie estabelese sentru votasaun 100 no estasaun votasaun 120 entaun CNE la’ós koloka de’it iha sentru votasaun, maibé sei koloka mós ba estasaun votasaun sira-ne’ebé estabelese iha Covalima.
“Prosesu bainhira mak atu halo rekrutamentu ba ofisiál CNE ida-ne’e kompeténsia hosi nasioná, ha’u sei hein orientasaun hosi nasionál anúnsiu vaga mai Covalima prontu atu halo rekrutamentu hodi hasoru eleisaun parlamentár ami CNE Covalima sei hein,” nia dehan.
Dadus funsionáriu ne’ebé servisu iha CNE Covalima hamutuk na’in-sia (9) ne’ebé oras ne’e daudaun destaka ona ba postu administrativu neen (6), hodi observa servisu Sekretáriu Administrasaun Eleitorál (STAE) ne’ebé halo resensiamentu no atualiza baze dadus iha postu administrativu sira.
Jornalista : Celestina Teles
Editór : Cancio Ximenes
