OÉ-CUSSE 13 fevereiru 2023 (TATOLI) – Diretór Edukasaun Oé-Cusse, Daniel Mauno, informa, iha 2023 servisu edukasaun sei distribui tán mobiliáriu meza no kadeira ba eskola sira, hahú hosi pré-eskolár to’o sekundáriu jerál no tékniku vokasionál sira iha rejiaun ne’e.
“Tinan ne’e ita fahe meza no kadeira ba eskola sira, maibé meza no kadeira sira-ne’e tanba 2021 to’o 2022 ita halo ona konstrusaun foun no reabilitasaun entaun meza kadeira ne’e rihun rua, ita prioridade de’it ba eskola 21 tanba ita harii ona nia laran ne’e sei mamuk, entaun iha tinan ne’e ita hahú fahe ba edifísiu foun sira-ne’e,” Daniel Mauno, hatete iha Oé-Cusse, segunda ne’e.
Tuir nia, ba eskola sira-ne’ebé enfrenta problema mobiliáriu, parte edukasaun rejionál planeia ona iha tinan ne’e sei distribui tán ba eskola seluk.
“Maibé ita-nia planu ne’e iha ona, liuliu meza no kadeira, kuadru, armáriu, ida-ne’e sei mai tán atu distribui ba eskola sira-ne’ebé menus, bazea ita-nia identifikasaun ne’ebé maka presiza tebes tenke hetan atensaun, ba eskola hotu-hotu maibé ita haree no identifika ida-ne’ebé maka menus liu,” nia katak.
Diretór Edukasaun ne’e la sita kona-bá valór orsamentu prevee ba planu ne’e maibé daudaun ne’e tékniku sira no inspetór eskolár sira identifika ona eskola balu, no iha eskola balu mós submete ona proposta iha diresaun kona-bá problema mobíliáriu iha eskola.
“Planu ne’e ita sei implementa iha tinan ne’e, maibé bainbain atu hola sasán sira-ne’e sei haan tempu, hanesan agora daudaun ita foin fahe planu 2021 no 2022, tanba kondisaun ita-nia emprezáriu difikuldade sempre iha,” nia katak.
Jornalista : Abílio Elo Nini
Editór : Evaristo Soares Martins
