DILI, 23 fevereiru 2023 (TATOLI)—Komisaun Nasionál Eleisaun (CNE) hamutuk ho Estadu Unidu ba Dezenvolvimentu Internasionál (USAID, sigla inglés) liuhosi organizasaun The International Foundation for Electoral Systems (IFES) fó kapasitasaun ba funsionáriu CNE 20-resin iha territóriu nasionál.
Prezidente CNE, José Agostinho da Costa Belo, hateten formasaun ho tema “Komunikasaun Estratéjika” ne’e ho objetivu atu hasa’e liutan funsionáriu CNE nia koñesimentu kona-ba fornese informasaun kredivel ba eleisaun parlamentár tinan 2023.
“Ha’u fiar liuhosi programa ida-ne’e, CNE sei kontrola publikasaun rezultadu eleisaun sira tuir mai iha mídia sosiál, ne’ebé tenke klaru no transparan iha prosesu eleisaun parlamentár ne’e,” Prezidente CNE, José Agostinho Belo, ba jornalista sira, iha workshop CNE ho tema ‘Komunikasaun Estratéjika’ iha salaun sentru mídia CNE, Colmera, kinta ne’e.
Iha formasaun ne’e sei foka ba matéria neen (6) hanesan fó edukasaun sívika ba votante sira, estratéjia ba komunikasaun krize, estratéjia trata mídia, estratéjia komunikasaun ba mídia, métodu efetivu hodi kontra dezinformasaun no dezeña mensajen edukasaun sívika no votante ne’ebé efetivu.
Diretora Misaun Interina USAID, Rebecca Robinson, hateten USAID iha kompromisu atu apoiu Timor-Leste hodi fornese informasaun kredivél ba públiku kona-ba eleisaun parlamentár 2023 ne’e.
“Nune’e, USAID suporta kapasitasaun ne’e atu ajuda CNE hodi fornese informasaun ba públiku durante períodu eleisaun,” nia dehan.
Tanba, nia dehan, Timor-Leste promove demokrásia, nune’e atividade ne’e hanesan parte ida hosi estratéjia hodi fornese informasaun kredivél kona-ba eleisaun parlamentár ne’ebé sei mai.
“Ida-ne’e hanesan parte ida hosi USAID nia apoiu ba CNE no Sekretariadu Tékniku Administrsaun Eleitorál (STAE) nia pesoál sira hodi kompreende estratéjia no mekanizmu informasaun kredivél ba públiku,” nia esplika.
Formasaun ne’e fornese hosi USAID liuhosi International Foundation for Election System (IFES) no formasaun ne’e sei hala’o durante loron rua hahú hosi kinta (23 fevereiru) to’o sesta (24 favereiru) ho fundu millaun $1.
Jornalista : Osória Marques
Editór : Cancio Ximenes
