DILI, 23 fevereiru 2023 (TATOLI)—Reitór Institutu Siénsia Saúde (ICS), Domingos Soares, husu ba graduadu na’in-256 ne’ebé simu ona graduasaun bainhira servisu karik buka hatudu profisionalidade hanesan ajente tékniku iha área saúde hodi salva ema seluk nia vida.
“Ha’u-nia rekomendasaun ne’ebé ha’u hato’o ba graduadu sira atu servisu tuir siénsia ne’ebé sira simu ona hatudu kualidade no profisionalidade nu’udar ema ajente tékniku iha area saúde hodi salva ema seluk nia vida,” Domingos Soares hatete ba jornalista sira iha Sentru Konvensaun Dili, kinta ne’e.
Nia dehan, servisu iha área saúde nu’udar vokasaun ida tanba ne’e vokasaun ne’e nu’udar xamamentu no profisaun ne’e mak sira-nia espesialidade ne’e, nune’e husu ba estudante finalista sira-ne’ebé simu ona graduasaun ne’e atu hatudu sira-nia responsabilidade iha servisu fatin hodi kontinua kumpre dever nu’udar ema profisionál ida iha área saúde.
“Ha’u husu ona ba graduadu na’in-256 ne’e bainhira atu ba servisu karik labele halo hanesan maluk sira seluk ne’ebé servisu ona, maibé la kumpre sira-nia dever no obrigasaun. Maibé ba ita-boot sira tenke sai ema ida-ne’ebé hatudu servisu ho kualidade no responsabilidade hodi tau matan ba ema moras sira,” nia hateten.
Tuir nia, hanesan ema ajente tékniku saúde nian labele halo hahalok hanesan ida-ne’e tanba ajente sira-ne’ebé servisu ba saúde atu buka salva ema nia vida, salva ema moras sira atu sai di’ak, ida ne’e mak hanaran servisu ba salvasaun.
Ministru Ensinu Superiór Siénsia no Kultura (MESSK) Longuinhos dos Santos, husu ba estudante ICS sira-ne’ebé gradua ona nu’udar poténsia riku soin Timor-Leste nian. tenke buka hakas an atu sai estudante pesoál saúde ida-ne’ebé iha kualidade iha servisu fatin liu-hosi atendimentu ba ema moras sira iha ne’ebé de’it.
Maibé governante ne’e la haluha hato’o parabéns ba graduadu sira-nian iha esperansa boot ba finalista ICS nian atu hetan susesu iha sira-nia vida pesoál no atu sai ema ida profisionál liuhosi sira-nia formasaun ne’ebé atinje ona.
Enkuantu estudante finalista ICS ne’ebé mak simu ona graduasaun ne’e mai hosi departamentu lima mak hanesan departamentu Enfermajen, departamentu Farmásia, Departamentu Parteira, Departamentu Nutrisaun no Departamentu Laboratóriu Siénsia Biometika.
Estudante graduadu hosi departamentu sira-ne’e mak hanesan Enfermajen na’in-13, Farmásia 59 Parteira 145, Nutrisaun 16 no Laboratóriu siénsia Biometika hamutuk na’in-123.
Hosi departamentu lima ne’ebé ohin estudante sira simu ona graduasaun ne’e bele dehan kursu enfermajen ho Farmásia gradua ba dala-lima ona, kursu parteira gradua ba dala-tolu ona, nutrisaun ba dala-rua no Laboratóriu siénsia Biometika foin mak ba dahuluk, tanba sira foin mak iha finalista.
Jornalista : Tomé Amado
Editór : Cancio Ximenes
