BOBONARO, 27 fevereiru 2023 (TATOLI) – Sentru Lojístika Nasionál (CLN), daudaun ne’e prepara ona orsamentu hamutuk millaun $8-resin atu sosa produtu lokál ho variedade hitu ne’ebé agrikultór sira iha territóriu nasionál prodús iha tinan ne’e.
Notísia relevante: CLN sei sosa foos importasaun tonelada 5.000 resin hosi Vietname
“Agora iha orsamentu jerál estádu ne’ebé mak aloka mai CLN porvolta iha osan millaun $8-resin, ita aloka ba sosa produtu lokál tanba ne’e prioridade iha polítika programa orsamentu ne’ebé mai ita sei sosa hare-kulit, batar, fore-mungu, fore-rai, fore-metan no koto,” Diretór Ezekutivu CLN, Jacinto Paizo, informa ba jornalista sira iha armazein CLN Maliana, segunda ne’e.
Diretór ne’e fundamenta, prosesu ba produtu hirak-ne’e iha oin rua, ezemplu hare-kulit presu normál kada kilograma $0,45 sé bainhira agrikultór rasik mak lori mai armazein kada kilograma $0,52.
Enkuantu prioridade ba sosa produtu lokál ne’e bazea ba despaxu hosi Ministru Koordenadór ba Asuntu Ekonómiku (MKAE), atubele kontribui ba rekuperasaun ekonomia.
“Ita sosa hodi nune’e bele insentiva produsaun nasionál, hodi bele kria servisu ba joven sira no mós trava osan ne’e bele hela iha ita-nia rai laran,” Paizo akresenta.
Tanba ne’e CLN prepara ona armazein kapasidade iha timor laran ne’e purvolta tonelada rihun 59, maibé maioria armazein sei mamuk komposta hosi armazein Maubisse, Maliana, Baucau rua, Tibar, Natarbora no Dili.
“Ita-nia armazein asegura prontu atu sosa produtu lokál ho orsamentu millaun $8 ne’e aloka ba sosa produtu lokál ne’e kada item ne’e ketak-kekak, ezemplu fore-mungu tonelada 150, koto, batar, fore-mungu sira-ne’e hanesan, hare kulit tonelada 3.600, ne’e orsmentu asegura hotu ona fahe ba territóriu laran tomak,” nia hatutan.
Diretór Ezekutivu CLN mós informa, daudaun ne’e kompañia lokál Graca Agro Unipesoal Lda dulas ona hare-kulit hamutuk tonelada 72 ne’ebé rai iha armazein CLN suku Holsa, postu administrativu Maliana, munisípiu Bobonaro.
Nia haktuir, hare-kulit ne’e sosa hosi grupu agrikultór sira hamutuk tonelada 466 tinan 2021.
“Prosesamentu la’o ona, señór Prezidente CLN fó ajudikasaun ba kompañia iha Maliana ne’e rasik señór Vidál nia naran Graca Agro, nia mak agora sosa, foin daudaun ne’e purvolta hare- kulit ne’e mai hosi 2021, ita kontrata ona ho kompañia agora hasai ona tonelada 72 sei dulas daudaun,” nia katak.
Diretór ezekutivu ne’e subliña, tuir planu sei dulas hotu hare-kulit tonelada 466 hodi hamaluk sentru armazein refere, nune’e simu fali estoke foun.
Notísia relevante: CLN sei sosa hare-kulit tonelada 3000 iha territóriu nasionál
Jornalista : Sérgio da Cruz
Editór : Evaristo Soares Martins
