DILI, 28 fevereiru 2023 (TATOLI)–Reprezentante UNICEF iha Timor-Leste, Bilal Aurang Zen Durrani, hateten UNICEF ne’ebé durante ne’e sai parseiru di’ak ba Ministériu Edukasaun preokupa ho kualidade edukasaun iha Timor-Leste, tanba ne’e sira ezije revizaun ida ho lalais atu mellora liu tan kualidade iha setór edukasaun.
Nia hateten asuntu ne’e iha ninia diskursu ba enkontru dahuluk kona ba asaun konjunta ba edukasaun Timor Leste (ACETL) iha tinan 2023 ne’e, tanba nia hanoin hikas iha tinan 2022 liubá iha preparasaun ba Transforming Education Summit, konsultasaun balu hala’o iha munisipiu no nivál nasionál ho parte interresante balun tenke uza setór revizaun konjunta.
“Ha’u konkorda ona iha enkontru ne’e, kona-ba nesesidade ba Setór revizaun konjunta ida, Hau hanoin importante atu hala’o revizaun ho lalais ho foku ba fatór sira mak afeta ba kualidade edukasaun. Atuál ministériu edukasaun no mós parseiru sira bele konkorda kona-ba apoiu ba ministériu edukasaun hodi mellora kualidade edukasaun,” Bilal Durrani hateten ba diretór jerál no diretór nasionál inklui diretór Munisipál sira iha salaun City 8, Manleu, tersa ne’e.
Nia hateten, iha duni nesesáriu ba dezenvolve estrutura monitorizasaun ida hodi ajuda no akompaña progresu relasiona ho kompromisu sira halo ona iha deklarasaun nasionál aprezenta hosi Transforming Education Summit iha setembru 2022, inkluindu aumentu asesu ba edukasaun atu labarik sira mak la eskola no uza dijitál ativu hodi habelar asesu aprendizajen ba labarik sira hotu.
Iha enkontru ikus ACETL nia iha marsu 2022, konsege hetan ona konkordánsia ida kona-ba pontu asaun xave tolu mak hanesan, atu iha enkontru ACETL regulár sira iha nivel estratéjiku hamutuk ho Ministru Edukasaun pelumenus tinan ida dala-rua.
Enkontru ne’e hamoris fali grupu servisu tékniku sira no halo diskusaun temátiku beibeik ne’ebé lidera hosi prespetiva diretór jerál sira, realiza revizaun sesaun konjunta konforme rekomenda ona hosi GPE ba inventarizasaun rápidu iha Planu Setór Edukasaun.
“Ha’u konsiente katak ladún iha progresu barak ba buat balun. Ha’u iha esperansa ba enkontru ohin loron ita bele to’o iha akordu ida kona-ba dalan ba oin ba asaun tolu sira-ne’e iha ita-nia enkontru ikus. Ha’u mós kontente hodi haree ajenda ohin loron ne’e inklui akordu ida kona-ba Grupu Servisu Tékniku mak hanesan pontu ida hosi asaun sira-ne’e.
Haree kona-ba ajenda diskusaun ba selesaun coprezidente foun ba ACETL nian ne’e, UNICEF iha prazér kontinua apoia papél ne’e iha dekade liubá, hahú tinan 2013 bainhira foin estabelese ACETL.
UNICEF kontente atu kontinua iha funsaun ne’e ka apoiu saida de’it atu kualkér parseiru bele hola hikas fali ninia funsaun.
“Ha’u hakarak fó hanoin fali katak ACETL ne’e Plataforma ida importante bainhira diálogu setór edukasaun hala’o ho lideransa hosi Ministériu Edukasaun, hodi oferese ba Governu atu alkansa ninia rezultadu sira hosi setór edukasaun. Ami kongratula Governu ba nia kompromisu ba aumenta finansiamentu ba proporsaun orsamentu Estadu ba edukasaun no dezenlvolve ona estratéjia ida hodi lidera aprendizajen ne’ebé lakon no rekupera fali hosi pandemia COVID-19, inkluindu kona-ba literásia no numerasaun,” nia dehan.
Tanba ne’e, nia husu ba entidade hotu ne’ebé servisu iha área edukasaun atu aproveita forum ne’e hodi trasa estratéjia no servisu hamutuk atu aselera progresu no asesu ba edukasaun ho kualidade, hahú hosi edukasaun pre-primária.
ACETL nia ajénsia koordenadora dezempeña papél importante hodi halo asaun hanesan liña komunikasaun entre Governu ho membru sira seluk hosi grupu edukasaun lokál no mós entre grupu no Sekretariadu Globál ba Parseria Edukasaun.
“Ha’u kompreende katak ajenda ne’e apertadu loos ba enkontru ohin loron ne’e. Hau dezeja iha diskusaun ida produtivu durante sesaun sira mai ne’e. ha’u hakarak atu rona rezultadu sira no rekomendasaun sira ikus mai. Ha’u agradese ba Ministru Edukasaun nia lideransa hodi hala’o ba oin ajenda edukasaun no haree valor ACETL nia Plataforma iha Timor-Leste,” nia hateten.
Jornalista : Tomé Amado
Editór : Cancio Ximenes
