DILI, 04 marsu 2023 (TATOLI)—Líder Rejisténsia no Eis Primeiru-Ministru, Xanana Gusmão, enkoraja estudante Universidade da Paz (UNPAZ) tenke sai ezemplu ba pás ba ema hotu-hotu.
“Imi iha ne’e, nu’udar estudante UNPAZ nian, ha’u lakohi rona imi baku malu, estraga malu. Kuandu ha’u rona nune’e, ha’u mai taka tiha tiha UNPAZ. Tanba violensia la rezolve buat ida. Estudante UNPAZ tenke sai ezemplu ida ba pás iha sosidade hotu hotu,” Xanana Gusmão hateten iha nia intervensaun bainhira partisipa semináriu nasionál loron ida-ne’ebé organiza hosi Universidade da Paz (UNPAZ), sábadu ne’e.
Entretantu, líder krasimátiku ne’e mós husu ba dosente UNPAZ hotu, atu eduka estudante sira ho didi’ak, nune’e bele prodús rekursu umanu ne’ebé kualidade hodi bele sai sidadaun ne’ebé di’ak.
“Ba dosente sira-ne’ebé tuur iha ne’e, imi mesak ema di’ak de’it. Ha’u hakarak husu ba imi importante loos mak sai edukadór ne’ebé di’ak ba ita-nia estudante sira, atu sira sai sidadaun ne’ebé di’ak hodi hadomi rai ida-ne’e no povu ida-ne’e,” Xanana Gusmão hateten.
Jornalista : Natalino Costa
Editór : Cancio Ximenes
