VIQUEQUE, 13 marsu 2023 (TATOLI)— Komandante Polísia Nasionál Timor-Leste (PNTL), Munisípiu Viqueque, Superintendente Sebastião Alves Quintão, orienta ona Komandante eskudra sira no Ofisiál Polísia Suku (OPS) na’in-36 atu asegura seguransa iha kampaña ne’ebé akontese iha loron 19 abríl no Eleisaun Parlamentár iha loron 21 maiu 2023.
“Ohin, Komandante Eskuadra na’in-lima no OPS na’in-36, mai priense ona formuláriu kona-ba difikuldade hanesan estrada liga ba sentru votasaun sira-ne’ebé labele asesu ba transporte no fatin sira-ne’ebé maka dala barak joven sira hamosu perturbasaun orden públiku ruma. Nune’e ami bele koloka membru sira-ne’ebé identifika ona atu asegura kampaña no Eleisaun Parlamentár”, hateten Komandante Sebastião Quintão ba Agência TATOLI iha kna’ar fatin, segunda ne’e.
Daudaun ne’e, nia dehan iha munisípiu Viqueque no postu administrativu sira ne’e hahú iha konsolidasaun polítika hosi partidu polítika sira.
“Ita hatene konsolidasaun la hamutuk iha fatin ida, maibé partidu sira halo iha fatin ketak, nune’e PNTL nafatin akompaña. Komadante Eskuadra sira iha obrigasaun tenke hela iha eskuadra hodi orienta nafatin membru sira hodi destaka ba fatin konsolidasaun nia”, nia haktuir.
Atu garante seguransa iha atividade polítika, Komandante PNTL munisípiu Viqueque ne’e husu ba lideransa partidu polítiku sira fó koñesimentu ba parte autoridade seguransa atu fó seguransa ba konsolidasaun no kampaña polítika sira ne’ebé la’o.
“Atividade sira ne’e la’o ba ami importante mak fó koñesementu, atu ami bele hatene katak fatin ida-ne’e ema halo atividade konsolidasaun hodi ami bele koloka membru sira. Ami sei koloka memberu sira ba kualker partidu politiku sira mai halo sira atividade polítika”, Komandante ne’e kompromete.
Tuir dadus Sekretariadu Tékniku Administrasaun Eleitorál (STAE) Viqueque katak sei estabelese Sentru Votasaun 112 no estasaun votasaun 135. Enkuantu dadús eleitór munisípiu Viqueque provizóriu na’in 58.867, kompostu husi mane na’in-29.938 no feto 28.897.
Jornalista :Vitorino Lopes da Costa
Editór : Florencio Miranda Ximenes
