DILI, (TATOLI) – Governu liuhusi Sekretariu Estadu asuntu Kombatente Libertasaun Nasionál no Ministériu Estatal hahú prepara kondisaun atu komemora Loron Nasionál Eroi ne’ebé monu iha 31 dezembru.
Tanba ne’e, segunda ne’e iha Palásiu Prezidente Nicolau Lobato, Bairru Pité, Sekretáriu Estadu asuntu Kombatente Libertasaun Nasionál Veteranu, Gil da Costa Monteiro “Oan Soru” no Diretór Jerál Ministériu Estatal, hala’o enkontru ho Prezidente Repúblika, Francisco Guterres Lú Olo, atu junta ajenda entre Governu no Prezidénsia Repúblika ba komemorasaun refere.
“Prezidénsia Repúblika mós sei iha ajenda balun entaun hosi Ministériu Estadu asuntu Kombatente Libertasaun Nasionál ho Diretór Jerál Ministériu Estatal ninian mai koordena hamutuk para bele junta programa sira ne’e sai ajenda úniku”, katak Gil ba jornalista sira, hafoin sorumutu.
Nia haktuir sekuénsia hosi komemorasaun ne’e maka halo marsa hosi Palásiu Prezidénsia Repúblika ba to’o iha Estátua Saudozu Nicolau Lobato nian iha Komoro hodi presta omenájen.
Orsamentu hodi hala’o eventu ne’e, Gil haktuir montante mill $60 iha ne’ebé sei aloka mill $2 ba kada munisípiu hodi halo reflesaun.
“Importante maka ita-nia jerasaun sira ka povu iha munisípiu sira la inteira katak loron 31 dezembru ne’e loron saida nian. Entaun, ita hahú dadauk ona maske ho osan ki’ik, nune’e autoridade munisípiu inklui veteranu sira ne’ebé espalla iha munisípiu hotu-hotu partisipa iha reflesaun ne’e”, tenik.
Iha biban ne’e, nia haklaken ministériu kompetente husu ba Prezidente Repúblika para diriji mensajen iha tempu badak hanesan mensajen Estadu ba timoroan hotu, nune’e partisipa loron importante ne’e iha ida-idak nia munisípiu liuhusi halo reflesaun.
Loron 31 dezembru nu’udar loron ne’ebé saudozu Nicolau Lobato hakotu nia iis iha kombate, tan ne’e loron ne’e maka Estadu desidi sai Loron Nasionál Eroi.
Jornalista: Xisto Freitas
Editora: Rita Almeida
