ATAÚRO, 14 abril 2023 (TATOLI) – Empreza Fitun Galileia no Ligelina entrega ona sentru izolamentu no laboratóriu ba Ministériu Saúde (MS) hafoin konklui konstrusaun ba projetu ida ne’e iha Suku Beloi Postu Administrativu Ataúro, Munisípiu Ataúro.
”Ami ohin entrega ona konstrusaun ba sentru izolamentu no laboartoriu ida ne’e ba Ministériu Saúde atu utiliza ba moras sira”, tékniku ba kompaña Fitun Galileia Juliao Baptista dehan ba jornalista sira iha ámbitu serimónia inagurasaun fatin izolamentu no Laboratóriu iha Ataúro, ohin.
Nia rekorda, MS fó projetu ne’e iha tinan 2020 no remata iha 2021 ho orsamentu $ 303.146.46.
“Ami hahú kontrui iha loron 9 fulan setembru 2020 no remata iha loron 30 fulan dezembru 2021. Maibé ami atu kompleta tan buat balun iha konstrusaun ne’e iha momentu ne’eba loja hotu taka no labele halo kompras depois ita-nia transporte atu mobiliza sasan mós problema oituan ho ró, entaun ida ne’e mak ami-nia difikuldade durante ne’e no ohin loron ami entrega ona ba MS”, nia afirma.
Iha fatin hanesan, Ministra Saúde Odete Maria Freitas Belo, agradese ba kompaña Fitun Galileia no Ligelina ne’ebé halo konstrusaun ba sentru izolamentu no Laboratóriu iha Ataúro.
”Ohin ita inagura ita-nia sentru izolamentu ida ne’e atu atende ba kazu Covid-19 nian tanba durante ne’e ita luta ba kazu ida-ne’e bainhira kazu ne’e mosu ami mós iha fundu ba ida ne’e entaun ami hakarak aproveita fundu ne’e hodi halo izolamentu iha fatin hotuhotu atu prepara ba moras sira ne’e”, Governante ne’e esplika.
”Ita mós haree katak kazu Covid-19 komesa lakon maibé agora daudaun Organizasaun Mundiál Saúde seidauk deklara kona-ba pandemia ne’e remata ona. Bainhira ita haree kazu Covid-19 la iha ita sei uza fatin ne’e sai fatin sentru internamentu ospitalár”, nia konklui.
Jornalista : Felicidade Ximenes
Editór : Zezito Silva
