DILI, 25 abríl 2023 (TATOLI)—Portavós ba kampaña partidu CNRT, Roberto Soares, fó sai pozisaun partidu CNRT nian hodi deklara katak CNRT laiha tempu hatán pedidu hosi partidu FRETILIN atu halo debate kona-ba asuntu fronteira marítima ho Ró Haksolok.
Roberto Soares hakarak informa mós ba públiku eleitoradu sira katak bazeia ba karta pedidu hosi partidu FRETILIN iha loron 20 fulan-abríl tinan 2023 ho númeru referénsia 37/SNCCF/2023, nune’e mós pedidu opiniaun mai hosi CNE kona-ba asuntu debate markadu ba loron 22 abríl 2023.
“Prezidente CNRT hato’o hanoin hirak tuir mai, husu deskulpa ba CNE tanba konsidera katak iha períodu kampaña eleitorál partidu CNRT sei laiha tempu ba debate espesifiku kona-ba asuntu fronteria marítima no Ró Haksolok,” Kordenadór Kampaña Partidu CNRT ne’e hato’o pozisaun partidu nian liuhosi konferénsia imprensa ba jornalista sira iha sede partidu CNRT, Bairru dos Grolhos, tersa ne’e.
Nia hatutan, fronteira marítima asina ona hosi Governu dahitu iha ONU no mós ratifika ona iha Parlamentu Nasionál, no partidu FRETILIN deklara ona ninia votu kontra ba tratadu fronteira marítima ho nia anexu sira.
Nia dehan, molok atu asina no ratifika prosesu fronteira marítima, iha tempu ne’eba, Primeiru-Ministru, Rui Maria de Araújo, sempre konvoka enkontru altu nível Estadu nian hodi hato’o rezultadu negosiasaun kona-ba fronteira maritima.
Nia hatutan, kona-ba Ró Haksolok laiha ona oportunidade atu diskute tanba prosesu investigasaun la’o ona iha CAC ho Ministériu Públiku, tanba ne’e sei laiha debate apropriadu ba matéria referida tanba se lae sei influénsia opiniaun públika hodi divulga segredu justisa.
Partidu CNRT konsidera tema debate kona-ba fronteira marítima finaliza tiha ona, só falta de’it fronteira terrestre ho Indonézia no Ró haksolok nia prosesu iha Ministériu Públiku.
Ikus liu, portavóz kampaña partidu CNRT ne’e nafatin husu ba militante, simpatizante, apoiante CNRT sira atu mantein klima tuir orden no pás durante períodu kampaña eleitorál to’o iha loron eleisaun 21 maiu 2023.
Jornalista : Nelson de Sousa
Editór : Cancio Ximenes
