VIQUEQUE, 09 maiu 2023 (TATOLI)–Segundu Komandante Polísia Nasionál Timor-Leste (PNTL), Komisáriu Polísia Pedro Belo, husu ba Uatolari-oan hotu atu asegura Eleisaun Parlamentár ne’ebé sei realiza 21 maiu 2023 bele la’o ho di’ak.
“Ha’u hakarak husu ba Uatolari-oan sira, imi tenke asegura Eleisaun ida-ne’e la’o ho di’ak, pás no estabilidade nia laran. Tanba ne’e, ita hotu-hotu tenke asegura Eleisaun Parlamentár ne’e,” Komisáriu Polísia hateten iha salaun Parokia Uatolari, tersa ne’e.
Nia husu ba abitante sira tenke simu rezultadu Eleisaun no apoiu ba Governu sé de’it mak kaer ukun tuir mai.
“Dalan demokrasia maka hanesan ne’e, ita tenke fó apoiu ba malu tanba Konstituisaun maka haruka no demokrasia tenke buras mós iha postu Uatolari. PNTL la depende ba família no partidu ruma, ami sei kumpre de’it lei,” nia akresenta.
Notísia relevante : Konfrontu iha Uatolari rezulta uma hitu hetan estragu no vítima 16
Nia dehan, daudaun membru destakadu iha Uatolari halo kolaborasaun ho komunidade hodi halo prevensaun ba konflitu atu hamutuk asegura ba festa demokrasia.
“Partidu ne’ebé de’it maka manán, ita hotu manán, ne’ebé ita presiza fó apoiu tomak,” nia tenik.
Biban ne’e, nia husu ba inan aman sira atu fó hanoin ba oan joven sira atu labele komete krime ruma no joven sira tenke hatudu komportamentu di’ak iha komunidade nia le’et.
Segundu Komadante afirma, sei mantein membru ho apoiu hosi FALINTIL-Fprsa Defeza Timor-Leste (F-FDTL) destaku iha postu administrativu Uatolari hodi asegura festa demokrasia.
Jornalista : Vitorino Lopes da Costa
Editora : Julia Chatarina
