DILI, 10 maiu 2023 (TATOLI) – Koordenadór ekipa preparasaun Eleisaun Parlamentár iha Hospitál Nasionál Guido Valadares (HNGV), Miguel Guterres, hateten HNGV submete ona lista pasiente hamutuk 404 no funsionáriu ba Sekretariadu Tékniku Administrativu Eleitorál (STAE) hodi kria fatin votasaun.
“Ami durante ne’e servisu hamutuk ho STAE hodi kria fatin votasaun ba funsionáriu no pasiente sira ne’ebé baixa iha ospitál atu vota iha ne’e, pasiente hamutuk 404 entaun ami-nia ekipa prepara dadus ba pasiente no pesoál sira ne’ebé mak servisu iha HNGV hodi tuir eleisaun parlamentár ne’ebé ma”, Miguel Guterres, dehan ba jornalista sira iha HNGV, ohin.
Nia informa, durante ne’e konsellu diretivu orienta ona funsionáriu ne’ebé servisu iha loron eleisaun maibé sira nia eleitorál husi munisípiu bele vota iha HNGV.
“Tuir orientasaun ne’ebé konsellu iha ba funsionáriu ne’ebé mak servisu iha loron eleisaun liuliu ba funsionáriu ne’ebé eleitorál husi munisípiu, ami submete ona lista ba STAE, entaun dadus ne’ebé ami foti ne’e bazea ba sira ne’ebé tama iha loron 20 kalan, dader vota tiha mak sira fila no sira ne’ebé servisu iha loron 21 loron”, nia esplika.
Nia afirma, HNGV sei foti tan lista pasiente daruak nian, hahú ohin liuliu iha sira ne’ebé servisu enfermaria.
“Ami sei foti tan lista dadus pasiente daruak nian, hahú ohin sira ne’ebé servisu iha enfermaria no pasiente ne’ebé mak baixa ho nia família ida sira sei tuir eleisaun iha ospitál”, nia deklara.
Nia dehah, daudaun ne’e HNGV sei rekolla dadus pasiente bazeia ba kama ne’ebé mak iha ospitál tanba tuir família ida no pasiente ida mak sei vota.
“Dadus ba pasiente daudaun ne’e ami sei lao hela, ami foti dadus bazeia ba kama sira ne’ebé mak iha hospitál tanba ita-nia kama iha ne’e hamutuk 421 inklui ho família pasiente”, nia konklui.
Jornalista : Felicidade Ximenes
Editór : Zezito Silva
