VIQUEQUE, 11 maiu 2023 (TATOLI)–Administradór postu Uatulari, munisípiu Viqueque, Manuel do Rosário, husu Ministériu Agrikultura no Peska (MAP) hadi’a irrigasaun a’at rua iha Uatulari ne’ebé hanesan área poténsia ba setór agrikultura.
“Povu Uatulari la’ós baruk lakoi halo natar, sira badinas. Irrigasaun balun oras ne’e ho kondisaun a’at to’o agora seidauk hadi’a. Irrigasaun ne’e liga ba natar Laliu no saleri, ne’ebé agora abandona de’it. Tanba ne’e, ha’u husu ba ministériu atu hadi’a irrigasaun hodi povu agrikultór sira halo natar hodi bele hasa’e produsaun hare,” Administradór hateten ba Agência Tatoli, iha postu Uatulari, kinta ne’e.
Nia dehan, kondisaun irrigasaun sempre difikulta serbisu agrikultór sira, nune’e labele halo atividade ruma.
“Irrigasaun a’at difikulta distribuisaun bee ba natar, tanba ne’e ha’u lori povu agrikultór sira-nia preokupasaun, hato’o ba ministériu relevante atu tau konsiderasaun ba irrigasaun sira-ne’ebé a’at,” nia akresenta.
Notísia Relevante: Kooperativa CDP-RDTL kolleta hare ektare rua iha Matahoi
Iha fatin ketak, Xefe suku Macadique, Afonso dos Reis, informa, antes ne’e nia parte hato’o ona ba Ministru Agrikultura no Peska bainhira halo vizita, maibé fó resposta katak irrigasaun ne’e volume boot.
“Ha’u la hetene bainhira maka Governu bele hadi’a hodi povu agrikultór sira bele hasa’e produsaun ai-han rai-laran no hadi’a ekonomia,” nia tenik.
Tuir dadus, natar área iha suku Macadique hamutuk ektare 469, ne’ebé hosi númeru ne’e iha ektare 200 maka daudaun abandonadu.
Antes ne’e, xefe suku, António Amaral, husu MAP hadi’a irrigasaun iha natar Paetun, maibé seidauk iha resposta. Iha tinan 2021 agrikultór halo esforsu hodi halai natar uza udan ben maibé tinan 2023 la halo ona atividade tanba kondisaun irrigasaun a’at halo bee la la’o ba natar.
Natar área hosi Paetun utiliza irrigasaun tolu hanesan Saelerin, Paetun no Olo-Malae iha área ektare 500, lokaliza iha suku Matahoi.
Jornalista : Vitorino Lopes da Costa
Editora : Julia Chatarina
