DILI, 15 maiu 2023 (TATOLI)—Vise bankada CNRT iha Parlamentu Nasionál, Patrocínio Fernandes, husu instituisaun defeza no seguransa atu koloka postu seguransa iha fatin ne’ebé risku hodi garante seguransa ba povu atu partisipa di’ak liután iha eleisaun parlamentár ne’ebé sei realiza iha 21 maiu 2023.
“Bankada CNRT husu ba instituisaun defeza no seguransa nian atu koloka postu seguransa iha fatin sira-ne’ebé konsidera risku ne’ebé povu labele hili ho livre hanesan iha Uatulari, Oesilo no iha fatin balun, hanesan ita hotu akompaña durante semana ida ka rua nia laran ne’e,” Vise Bankada CNRT ne’e hateten ba jornalista sira liuhosi konferénsia imprensa iha sala bankada CNRT iha Parlamentu Nasionál, segunda ne’e.
Iha parte seluk, bankada CNRT mós apela ba timoroan tomak relasiona ho kampaña eleitorál ne’e dadaun la’o hela atu ema hotu halo kampaña karik tenke tuir regra hodi lebele fó presaun ba malu no entre partisu polítika sira labele ameasa malu.
“Bankada CNRT kontinua apela ba timoroan tomak atu hala’o kampaña tuir regra ne’ebé iha no labele fó presaun ba malu, labele halo ameasa ba malu,” nia hateten.
Maibé, nia dehan, respeita prinsípiu eleisaun ne’ebé universál, livre, no sekretu hodi hakruk ba ema ida-dak nia direitu atu hili no tuir partidu ne’ebé sira fiar no tau konfiansa ba.
Jornalista : Nelson de Sousa
Editór : Cancio Ximenes
